പാലോട്: പെരിങ്ങമ്മല പഞ്ചായത്തിൽ യു.ഡി.എഫ് അംഗങ്ങൾ കഴിഞ്ഞ രണ്ടു ദിവസങ്ങളിലായി നടത്തിയ രാപ്പകൽ സമരം അവസാനിച്ചു. കഴിഞ്ഞ ആറുമാസത്തെ മിനിറ്റ്സ് ആവശ്യപ്പെട്ടാണ് യു.ഡി.എഫ് അംഗങ്ങൾ ഉപരോധം നടത്തിയത്. പൊൻമുടിയിലെ അനധികൃത നിർമ്മാണം,​ ഫണ്ടുകളുടെ തിരിമറി,​ പഞ്ചായത്ത് കമ്മിറ്റി എടുക്കാത്ത തീരുമാനങ്ങൾ പിന്നീട് എഴുതി ചേർക്കൽ എന്നിവ ഈ മിനിറ്റ്സിൽ ഉണ്ടെന്നായിരുന്നു യു.ഡി.എഫിന്റെ ആക്ഷേപം. മിനിറ്റ്സ് ആവശ്യപ്പെട്ടപ്പോൾ ആദ്യം അഞ്ച് കമ്മിറ്റിയുടെ പകർപ്പുകൾ മാത്രമാണ് സെക്രട്ടറി നൽകിയത്. തുടർന്ന് യു.ഡി.എഫ് അംഗങ്ങൾ ഗ്രാമപഞ്ചായത്ത് സെക്രട്ടറിയെ ഉപരോധിക്കുകയായിരുന്നു. ഇതിനെത്തുടർന്നാണ് സെക്രട്ടറി മിനിറ്റ്സ് നൽകിയത്.