തിരുവനന്തപുരം: ഓവർ ബ്രിഡ്ജിൽ നിന്ന് തമ്പാനൂരിലേക്ക് വരുന്ന ഭാഗത്ത് റോഡിൽ വൻ കുഴി രൂപപ്പെട്ടിട്ട് ആഴ്ച രണ്ടായി. തമ്പാനൂരിൽ നിന്ന് മാഞ്ഞാലികുളം റോഡ് തിരിയുന്ന ഭാഗത്ത് മാൻഹോളിനോട് ചേർന്നാണ് കുഴി. മാൻഹോളിന്റെ സ്ലാബ് കിടക്കുന്നതിനാൽ പെട്ടന്നാരും കുഴികാണില്ല. മിക്കവാഹനങ്ങളും ഈ കുഴിയിൽ വീഴും. മാ‌ഞ്ഞാലികുളം,എസ്.എസ് കോവിൽ എന്നീ റോഡിലേക്ക് പ്രവേശിക്കാൻ വരുന്നവർ ഒഴികെ വേഗതയിലാണ് എല്ലാവരുടെയും യാത്ര. സിഗ്നൽ ശ്രദ്ധിച്ചുവരുന്ന വാഹനങ്ങൾ വലിയശബ്ദത്തോടെയാണ് കുഴിയിൽ വീഴുന്നത്. ചിലപ്പോൾ അപകടങ്ങളും സംഭവിക്കും. ദിവസംകഴിയും തോറും കുഴിയുടെ ആഴവും കൂടുകയാണ്.

റോഡിന് കുറുകെ വാരിക്കുഴി

തമ്പാനൂർ പോസ്റ്റോഫീസിന് മുന്നിലെ റോഡിന് കുറുകെ സി.സി.ടിവി ക്യാമറ സ്ഥാപിക്കുന്നതിനുവേണ്ടി കുഴിച്ച സ്ഥലം ഇപ്പോൾ വാരിക്കുഴിക്ക് സമാനം. മാസങ്ങൾക്ക് മുമ്പാണ് കേബിളിടാനായി റോഡിന് കുറുകെ കുഴിയെടുത്തത്. താത്കാലികമായി കോൺക്രീറ്റിട്ട് മൂടിയെങ്കിലും ആളെ വീഴ്ത്താൻ ഈ കുഴി ധാരാളം. മാഞ്ഞാലികുളം എസ്.എസ് കോവിൽ റോഡിൽ നിന്നുവരുന്ന ഇരുചക്രവാഹനങ്ങളാണ് കൂടുതലായും ഈ കുഴിയിൽ വീഴുന്നത്. പലപ്പോഴും വാഹനങ്ങൾ ഉള്ളിൽ വീണ് പ്രയാസപ്പെട്ട് എടുക്കേണ്ട സ്ഥിതി. എത്രയും പെട്ടന്ന് ഈ പ്രശ്നത്തിന് പരിഹാരം കാണണമെന്നാണ് യാത്രക്കാരുടെ ആവശ്യം. കുഴിയിൽ വീഴാതിരിക്കാനായി പൊന്നറ ശ്രീധർ പാർക്ക് വഴി ചുറ്റിയും പോകുന്നവരുണ്ട്.