അമ്പലപ്പുഴ: ശ്രീനാരായണ മാനവസേവാ ട്രസ്റ്റിന്റെ നേതൃത്വത്തിൽ രോഗീപരിചരണ ഉപകരണങ്ങളുടെ വിതരണോദ്ഘാടനവും, ഭക്ഷ്യധാന്യക്കിറ്റ് വിതരണവും ഞായറാഴ്ച നടക്കുമെന്ന് ട്രസ്റ്റ് പ്രസിഡന്റ് മധു പി.ദേവസ്വം പറമ്പ് ,രക്ഷാധികാരി എൻ.മോഹൻദാസ്, ജോയിന്റ് സെക്രട്ടറി സന്ദീപ് സദാനന്ദൻ, ഓഫീസ് സെക്രട്ടറി എ.ബി.ഷാജി, ഉണ്ണികൃഷ്ണൻ അനുഗ്രഹ എന്നിവർ വാർത്താ സമ്മേളനത്തിൽ പറഞ്ഞു. കുട്ടനാട്ടിലെ നിർധനരായ കുടുംബങ്ങളെ സഹായിക്കുക എന്ന ലക്ഷ്യത്തോടെയാണ് ട്രസ്റ്റ് രൂപീകരിച്ചത്. 65 ലക്ഷം രൂപയുടെ സഹായമാണ് നൽകുന്നത്. 200 കുടുംബങ്ങൾക്ക് ആയിരം രൂപ വില വരുന്ന ഭക്ഷ്യധാന്യക്കിറ്റ്, 25 പേർക്ക് വീൽചെയറുകൾ, 20 പേർക്ക് ഡയാലിസിസ് കിറ്റ്, വാക്കർ , ഓക്സിജൻ സിലിണ്ടർ, വാട്ടർ ബെഡുകൾ, എയർ ബെഡുകൾ എന്നിവയാണ് വിതരണം ചെയ്യുന്നത്. .ഞായറാഴ്ച രാവിലെ 10ന് കരുമാടി കളത്തിൽപ്പാലം ജംഗ്ഷന് സമീപം നടക്കുന്ന ചടങ്ങിൽ എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ സമ്മേളന ഉദ്ഘാടനവും സഹായ വിതരണവും നിർവഹിക്കും. ട്രസ്റ്റ് പ്രസിഡന്റ് മധു .പി .ദേവസ്വം പറമ്പ് അദ്ധ്യക്ഷനാകും . എസ്.എൻ.ട്രസ്റ്റ് ബോർഡംഗം പ്രീതി നടേശൻ ഭദ്രദീപ പ്രകാശനം നിർവഹിക്കും.