മാന്നാർ: നവംബർ 1, 2 തീയതികളിൽ നടക്കുന്ന പരുമല പെരുന്നാളിനോടനുബന്ധിച്ച് മാന്നാറിൽ ഗതാഗത ക്രമീകരണം ഏർപ്പെടുത്തി. ഇന്ന് മുതൽ മാവേലിക്കര ഭാഗത്തേക്കുള്ള യാത്രാ ബസുകൾ മാന്നാർ മാജാ ബസാർ, തൃക്കുരട്ടി ക്ഷേത്രഭാഗം എന്നിവടങ്ങളിൽ നിറുത്തിയും, തിരുവല്ല ഭാഗത്തേക്ക് പോകുന്ന ബസുകൾ പരുമല പന്നായി പാലത്തിന് മുമ്പായി നിറുത്തിയും യാത്രക്കാരെ കയറ്റിയിറക്കേണ്ടതാണ്. അന്നേ ദിവസങ്ങളിൽ ടിപ്പർ ലോറികൾക്കും മറ്റ് ചരക്ക് വാഹനങ്ങൾക്കും മാന്നാർ ടൗൺ വഴിയുള്ള ഗതാഗതം നിരോധിച്ചു. പരുമല ജംഗ്ഷൻ വഴി ടൂറിസ്റ്റ് ബസുകൾ പളളിയിലേക്ക് കടത്തിവിടുന്നതല്ല. ചെങ്ങന്നൂർ, മാവേലിക്കര ഭാഗത്തുനിന്ന് സ്റ്റോർ ജംഗ്ഷൻ വഴിവരുന്ന ടൂറിസ്റ്റ് ബസുകൾ മാന്നാർ പ്രൈവറ്റ് ബസ് സ്റ്റാൻഡിൽ ആളിനെ ഇറക്കിയും തിരുവല്ലാ ഭാഗത്തുനിന്നും വരുന്ന ടൂറിസ്റ്റ് ബസുകൾ സൈക്കിൾമുക്ക് ഭാഗത്ത് ആളിനെ ഇറക്കിയും തിരികെ പോകണം.1,2 തീയതികളിൽ മാന്നാർ തൃക്കുരട്ടി ക്ഷേത്ര ഭാഗം മുതൽ പന്നായി പാലം വരെയുളള റോഡിന്റെ ഇരുവശങ്ങളിലും വാഹന പാർക്കിംഗ് ഒഴിവാക്കേതാണന്ന് മാന്നാർ പൊലീസ് ഇൻസ്പെക്‌ടർ എസ്.എച്ച്.ഒ. അനീഷ്.എ അറിയിച്ചു.