മൂവാറ്റുപുഴ: ഗ്യാസ് സംബന്ധമായ അസുഖത്തിന് കാഞ്ഞിരത്തൊലി തിളപ്പിച്ച് വെളളം കുടിച്ച അന്യസംസ്ഥാന തൊഴിലാളി ദമ്പതികളെ ഗുരുതരാവസ്ഥയിൽ മൂവാറ്റുപുഴ ജനറൽ ആശുപത്രിയിൽ പ്രവേശിപ്പിച്ചു. ചെറുവട്ടൂർ പൂവത്തൂരിൽ വാടകക്ക് താമസിക്കുന്ന അസാം സ്വദേശികളായ അക്ബർ അലി (55), ഭാര്യ സെലീമ ഖാത്തൂൺ (53) എന്നിവരാണ് രക്തം ഛർദിച്ച നിലയിൽ ആശുപത്രിയിൽ ചികിത്സ തേടിയത്. പ്ലൈവുഡ് കമ്പനി അടക്കമുളള സ്ഥാപനങ്ങളിൽ ഭക്ഷണം പാചകം ചെയ്ത് നൽകുന്ന ജോലിയാണ് ഇവർക്ക്. ഗ്യാസ് മാറാൻ കാഞ്ഞിരത്തൊലി ഉപദേശിച്ചത് ആരെന്ന് വ്യക്തമല്ല. കാഞ്ഞിരക്കുരുവും തോലും ഉളളിൽ ചെന്നാൽ മരണം വരെ സംഭവിക്കാമെന്ന് ആരോഗ്യ വിദഗ്ദ്ധർ പറഞ്ഞു.