* കെ.എസ്. യു പ്രവർത്തകൻ ആശുപത്രി​യി​ൽ

കാലടി: ശ്രീശങ്കര കോളേജിലെ തിരഞ്ഞെടുപ്പിൽ കെ.എസ്. യു ചെയർമാൻ സ്ഥാനാർത്ഥി ബോബിൻ ജോണിന്റെ പത്രിക തള്ളിയതിനെ ചൊല്ലിയുണ്ടായ തർക്കം എസ്.എഫ്.ഐ, കെ.എസ്.യു പ്രവർത്തകർ തമ്മിലുള്ള സംഘർഷത്തിൽ കലാശിച്ചു. സി.പി.എം നേതാക്കൾ പ്രിൻസിപ്പലിനെ ഭീഷണിപ്പെടുത്തി​യാണ് പത്രിക തള്ളിച്ചതെന്ന് കോൺഗ്രസ് ആരോപിച്ചു.

വിദ്യാർത്ഥി സംഘർഷത്തെ തുടർന്ന് കോളേജിലെത്തിയ കാലടി പൊലീസ് കെ എസ്.യു വിദ്യാർത്ഥികളെ തല്ലിച്ചതച്ചതായും ഫോൺ എറിഞ്ഞ് നശിപ്പി​ച്ചതായും വിദ്യാർത്ഥികൾ പറഞ്ഞു. ഗുരുതരമായി​ പരിക്കേറ്റ കെ.എസ്. യു പ്രവർത്തകൻ അഖിലി​നെ കളമശേരി മെഡിക്കൽ കോളേജിൽ പ്രവേശിപ്പിച്ചു. കെ.എസ്.യു നേതാക്കൾ മന:പൂർവം അക്രമമഴിച്ചുവിടുന്നതായാണ് എസ്.എഫ്.ഐ ആരോപണം. ഡിവൈ.എസ്.പിയുടെ നേതൃത്വത്തി​ൽ കൂടുതൽ പൊലീസെത്തിയാണ് രംഗം ശാന്തമാക്കിയത്.