മൂവാറ്റുപുഴ: ആസ്റ്റർ മെഡ്സിറ്റിയിലെ ക്ലിനിക്കൽ റിസർച്ച് ഡിപ്പാർട്ട്‌മെന്റ് ആശാ പ്രവർത്തകർക്കായി ആരോഗ്യകരമായ ജീവിതശൈലി പ്രമേഹ സാദ്ധ്യത കുറയ്ക്കുന്നു എന്ന വിഷയത്തിൽ സമഗ്ര പരിശീലന പരിപാടി സംഘടിപ്പിച്ചു. ഗർഭകാല പ്രമേഹം ബാധിച്ച വനിതകളിൽ പ്രസവ ശേഷമുള്ള പ്രമേഹ സാദ്ധ്യത ഇല്ലാതാക്കുക എന്ന ലക്ഷ്യത്തോടെ നടപ്പാക്കുന്ന ഗവേഷണ പദ്ധതിയാണ് മധുര പ്രതിരോധം. ഇതിൽ ആശാ പ്രവർത്തകരെക്കൂടി ഉൾപ്പെടുത്തുക എന്ന ലക്ഷ്യത്തോടെയാണ് മൂവാറ്റുപുഴ ലയൺസ്‌ ക്ലബിൽ പരിശീലന പരിപാടി സംഘടിപ്പിച്ചത്. ആസ്റ്റർ മെഡ്സിറ്റി റിസർച്ച് അഡ്മിനിസ്ട്രേറ്റർ ഡോ. ഉമാ വി .ശങ്കറിന്റെ നേതൃത്വത്തിലാണ് പദ്ധതി നടപ്പാക്കുന്നത്. നാല് വർഷത്തേയ്ക്ക് ഒരു കോടി 31 ലക്ഷം രൂപയാണ് ഐ.സി.എം.ആർ പദ്ധതിക്കായി ധനസഹായം നൽകുന്നത്. മൂവാറ്റുപുഴയിൽ സംഘടിപ്പിച്ച പരിപാടി നഗരസഭ കൗൺസിലർ ജോയ്സി മെറി ആന്റണി ഉദ്ഘാടനം ചെയ്തു. ആസ്റ്റർ മെഡ്‌സിറ്റിയിലെ പ്രോജക്ട് സയന്റിസ്റ്റ് ഡോ. മായ ചാക്കോ, ആസ്റ്റർ മെഡ്‌സിറ്റി ഓപ്പറേഷൻസ് ഹെഡ് ധന്യ ശ്യാമളൻ, പ്രൊജക്ട് മേധാവി ഡോ. ഉമാ വി. ശങ്കർ, എൻ.എച്ച്.എം ജില്ലാ കോ ഓർഡിനേറ്റർ സജിന എൻ. നാരായണൻ, സീനിയർ പ്രോജക്ട് അസിസ്റ്റന്റ് ടി. അനശ്വര, ഖൈറുന്നസ, സീനിയർ ക്ലിനിക്കൽ ഡയറ്റീഷ്യൻ ടീന ജോൺ, ജൂനിയർ ഫിസിയോ തെറാപ്പിസ്റ് ലക്ഷ്മി, സീനിയർ പ്രോജക്ട് അസിസ്റ്റന്റ് ബ്രിജിത്ത് ജാക്കുലിൻ എന്നിവർ പങ്കെടുത്തു.