കൊച്ചി: രാജ്യത്തെ തൊഴിൽ മേഖലയിലെ പ്രശ്‌നങ്ങൾക്ക് പരിഹാരമായി മൂന്നാം തൊഴിൽ കമ്മിഷനെ നിയമിക്കണമെന്ന് കേരള പത്രപ്രവർത്തക യൂണിയൻ 60-ാം സംസ്ഥാന സമ്മേളനത്തിന്റെ ഭാഗമായി സംഘടിപ്പിച്ച ട്രേഡ് യൂണിയൻ സെമിനാർ ആവശ്യപ്പെട്ടു. 'മൂലധന താത്പര്യങ്ങളും മാധ്യമ തൊഴിലാളികളും" എന്ന വിഷയത്തിലെ സെമിനാർ എ.ഐ.ടി.യു.സി സംസ്ഥാന ജനറൽ സെക്രട്ടറി കെ.പി. രാജേന്ദ്രൻ ഉദ്ഘാടനം ചെയ്തു.

പണിയെടുത്താൽ കൂലി കിട്ടണമെന്ന അടിസ്ഥാന കാര്യം പോലും പല മേഖലയിലും സാദ്ധ്യമാകുന്നില്ലെന്നത് യാഥാർത്ഥ്യമാണെന്നും ഇതിന് മാറ്റം വേണമെങ്കിൽ ട്രേഡ് യൂണിയൻ സംഘടനകളുടടെ ശക്തമായ മുന്നേറ്റം ആവശ്യമാണെന്നും കെ.പി. രാജേന്ദ്രൻ പറഞ്ഞു.

കെ.യു.ഡബ്ല്യു.ജെ സംസ്ഥാന പ്രസിഡന്റ് എം.വി. വിനീത അദ്ധ്യക്ഷയായി. സി.ഐ.ടി.യു ദേശീയ സെക്രട്ടറി കെ. ചന്ദ്രൻ പിള്ള, ഐ.എൻ.ടി.യു.സി ദേശീയ സെക്രട്ടറി കെ.കെ. ഇബ്രാഹിം കുട്ടി, ബി.എം.എസ് മുൻ ദേശീയ പ്രസിഡന്റ് സജി നാരായണൻ, എച്ച്.എം.എസ് മുൻ ദേശിയ പ്രസിഡന്റ് അഡ്വ. തമ്പാൻ തോമസ്, കെ.യു.ഡബ്ല്യു.ജെ നിയുക്ത പ്രസിഡന്റ് കെ.പി. റെജി , നിയുക്ത ജനറൽ സെക്രട്ടറി സുരേഷ് എടപ്പാൾ എന്നിവർ പ്രസംഗിച്ചു. സ്വാഗത സംഘം ചെയർമാൻ ആർ. ഗോപകുമാർ സ്വാഗതവും ജനറൽ കൺവീനർ എം. ഷജിൽ കുമാർ നന്ദിയും പറഞ്ഞു.