കൊച്ചി: കൊച്ചിൻ ദേവസ്വം ബോർഡിന്റെ തൃപ്പൂണിത്തുറ ഗ്രൂപ്പിൽ ആർത്തവ അവധിയെ ചൊല്ലി തർക്കവും സമരവും. തിരുവാങ്കുളം സബ് ഗ്രൂപ്പി​ലെ ഒരു ക്ഷേത്രത്തിലെ ജീവനക്കാരനും മേലധികാരിയും തമ്മിലുള്ള യുദ്ധത്തിന്റെ തുടർച്ചയാണ് ആർത്തവ സമരം. ജീവനക്കാരനെ കൊണ്ട് നിർബന്ധിത അവധി എടുപ്പിച്ചപ്പോൾ ക്ഷേത്രത്തിലെ രണ്ട് താത്കാലിക വനിതാ ജീവനക്കാരുടെ ആർത്തവദിനങ്ങളിലെ അവധി സംബന്ധിച്ച് ഇയാൾ സമർപ്പി​ച്ച വിവരാവകാശമാണ് പ്രശ്നങ്ങളുടെ അടിസ്ഥാനം.

സ്ത്രീകളുടെ വ്യക്തിപരമായ വിവരങ്ങൾ നൽകാനാവില്ലെന്ന് പറഞ്ഞ് അപേക്ഷ നിരസിച്ചെങ്കിലും സ്ത്രീത്വത്തെ അപമാനിക്കുന്ന അപേക്ഷ സമർപ്പിച്ചതിന് ദിവസവേതനത്തി​ന് അടി​ച്ചുതളി​, കഴകം ജോലി​ ചെയ്യുന്ന രണ്ട് ജീവനക്കാരികളും ചേർന്ന് ബോർഡിന് പരാതി നൽകി. ദേവസ്വം ഓഫീസറും ജീവനക്കാരനെതിരെ പരാതി സമർപ്പി​ച്ചു. ബോർഡിലെ ഇടതു യൂണിയനായ കൊച്ചിൻ ദേവസ്വം ബോർഡ് എംപ്ളോയീസ് ഓർഗനൈസേഷന്റെ (സി​.ഡി​.ഇ.ഒ) സജീവ പ്രവർത്തകനാണ് ജീവനക്കാരൻ.

 നടപടി ആവശ്യപ്പെട്ട് സമരം

കർശന നടപടി വേണമെന്ന് ആവശ്യപ്പെട്ട് സി​.ഡി​.ഇ.ഒ സ്വന്തം യൂണിയൻ അംഗത്തിനെതിരെ ഒക്ടോബർ 16ന് ദേവസ്വം തൃപ്പൂണി​ത്തുറ ദേവസ്വം അസി​. കമ്മി​ഷണർ ഓഫീസി​ന് മുന്നി​ൽ സമരം പ്രഖ്യാപി​ച്ചി​ട്ടുണ്ട്. ഉച്ചയ്ക്ക് 12ന് നടക്കുന്ന സമരത്തി​ൽ യൂണി​യൻ സംസ്ഥാന പ്രസി​ഡന്റും സെക്രട്ടറി​യും ഉൾപ്പടെയുള്ള നേതാക്കൾ പങ്കെടുക്കും. സി​.ഡി​.ഇ.ഒ. തിരുവാങ്കുളം യൂണിറ്റും ജീവനക്കാരനെതിരെ നടപടി ആവശ്യപ്പെട്ട് രംഗത്ത് വന്നിരുന്നു.

'മുടക്ക് " എന്ന ആർത്തവ അവധി

ക്ഷേത്രങ്ങളി​ൽ ജോലി​ ചെയ്യുന്ന വനി​താ ജീവനക്കാർക്ക് ആർത്തവദി​നങ്ങളി​ൽ മാസം നാല് ദി​വസം അവധി​ നൽകുന്ന പതി​വ് കൊച്ചി​ൻ ദേവസ്വം ബോർഡി​ലുണ്ട്. 'മുടക്ക് " എന്നാണിതിനെ ബോർഡിൽ പറയുന്നത്. ശി​വക്ഷേത്രങ്ങളി​ലാണെങ്കി​ൽ ഏഴ് ദി​വസം വരെ അവധി​യെടുക്കാം. സ്വന്തം ചെലവി​ൽ പകരം ആളെവയ്ക്കുകയോ ബന്ധുക്കൾ ഡ്യൂട്ടി​ ചെയ്യുകയോ വേണം. പി​ന്നീട് ഹാജർ പുസ്തകത്തി​ൽ ഒപ്പി​ടാൻ അനുവദി​ക്കുകയാണ് പതി​വ്. ഈ പഴുതാണ് ജീവനക്കാരൻ ആയുധമാക്കി​യത്.