തൃപ്പൂണിത്തുറ: വെള്ളം കെട്ടിക്കിടന്ന് നീരൊഴുക്ക് നിലച്ച മേക്കര വാലുമ്മേൽ തോട് ബാർജ് ഉപയോഗിച്ച് ശുചീകരിച്ച് കിഴക്ക് കോണോത്തു പുഴയുമായി ബന്ധിപ്പിച്ചു. ഇതോടെ പ്രദേശത്ത് നാളുകളായി നിലനിന്ന വെള്ളക്കെട്ടിന് പരിഹാരമായി. വാർഡ് കൗൺസിലർ ഡി.അർജുനന്റെ നേതൃത്വത്തിൽ 200 മീറ്റർ നീളത്തിൽ നിരപ്പായി കിടന്ന ഭാഗത്ത് ചാല് കീറി ഇരുഭാഗങ്ങളും വീതി കൂട്ടി ചെളിയും മണ്ണും നീക്കി മൂന്ന് ദിവസമെടുത്താണ് തോടിനെ കോണോത്തു പുഴയുമായി ബന്ധിപ്പിച്ചത്. മഴക്കാലത്ത് ചൂരക്കാട്, ശാന്തി നഗർ, വാലുമ്മേൽ പ്രദേശങ്ങളിൽ വെള്ളക്കെട്ട് ഇല്ലാതാക്കുന്നത് ഈ തോടാണ്. തെക്ക് പുതിയകാവ് ഭാഗത്ത് നിന്നും വടക്ക് കണ്ണൻകുളങ്ങരയിൽ നിന്നും വരുന്ന തോടുകൾ കോരയ്ക്കൽ തോട്ടിൽ ഒന്നായി വാലുമ്മേൽ തോട്ടിലൂടെയാണ് കോണോത്തു പുഴയിൽ ചേരുന്നത്.