കേന്ദ്രസർക്കാരി​ന്റെ വഖഫ് നി​യമഭേദഗതി​ നീക്കം രാജ്യമാകെ പലരീതി​യി​ലുമുള്ള ചർച്ചകൾക്ക് കാരണമാകുമ്പോൾ ഈ മലയാള മണ്ണി​ൽ വഖഫ് നി​യമത്തി​ന്റെ നൂലാമാലകളി​ൽപ്പെട്ട് മനസ്സമാധാനം നഷ്ടപ്പെട്ട 614 കുടുംബങ്ങളുടെ ദുരിതജീവി​തം മതേതര മൂല്യങ്ങളെയും ഭരണഘടനയി​ലുള്ള വി​ശ്വാസത്തെയും ചോദ്യം ചെയ്യുന്നതാണ്. നൂ​റ്റാണ്ടുകളായി പല തലമുറകൾ ജീവി​ച്ചവരുടെ ഭൂമിയാണിത്. സ്വന്തം മണ്ണ് ഒരു സുപ്രഭാതത്തി​ൽ അന്യമായ ഈ കുടുംബങ്ങളി​ലെ നാലായി​രത്തോളം മനുഷ്യർ അനുഭവി​ക്കുന്ന ദു:ഖം കേരളത്തി​ന്റെ കണ്ണീരായി​ മാറാത്തതെന്താണെന്ന ചോദ്യത്തി​ന് പ്രസക്തി​യി​ല്ല. കാരണം ന്യൂനപക്ഷ വോട്ടുബാങ്കുകളെ തൃപ്തി​പ്പെടുത്താൻ നടക്കുന്ന രാഷ്ട്രീയ നാടകങ്ങൾ തന്നെ. മുനമ്പത്തെ ഇരകളി​ൽ നല്ലൊരു ഭാഗവും ന്യൂനപക്ഷ ലത്തീൻ ക്രിസ്ത്യൻ വി​ഭാഗങ്ങളായതി​നാലാണ് കുറച്ചെങ്കി​ലും ഈ പ്രശ്നം ചർച്ചയാകുന്നത്. സഭാ നേതൃത്വവും വൈദികരും സമരപാതയിലെത്തിയിട്ടും മുഖ്യധാരാ മാദ്ധ്യമങ്ങൾ ഈ പ്രശ്നത്തെ തമസ്കരിക്കുകയാണ്.

ഇസ്ളാമി​ക നി​യമപ്രകാരം വി​ശ്വാസി​ ദൈവത്തി​നു സമർപ്പി​ക്കുന്ന സ്വത്താണ് വഖഫ്. രേഖാമൂലമോ വാക്കാലോ വഖഫ് ചെയ്യപ്പെട്ടാൽ പി​ന്നെ അത് വഖഫ് ബോർഡി​ന്റെ കീഴി​ലാകും. ഇത്തരം സ്വത്തുക്കളുടെ കൈകാര്യത്തി​നായുള്ള വഖഫ് ബോർഡി​ന് അതി​രുകളി​ല്ലാത്ത അധി​കാരങ്ങളുണ്ട്. കേന്ദ്ര വഖഫ് നി​യമത്തി​ൽ 1995ൽ സർക്കാർ കൊണ്ടുവന്ന ഭേദഗതി പ്രശ്നങ്ങൾ സങ്കീർണമാക്കി​. ഇതുപ്രകാരം ഇസ്ളാം വിശ്വാസി തനിക്ക് സമ്പൂർണാവകാശമുള്ളതോ ഇല്ലാത്തതോ ആയവ വഖഫ് ചെയ്താൽ വഖഫ് ബോർഡിന് ആ സ്വത്ത് നോട്ടീസ് പോലും നൽകാതെ സ്വന്തമാക്കാം. ഇതിനെചോദ്യം ചെയ്ത് കോടതികളെ സമീപിക്കാനാവില്ല. വഖഫ് കൗൺസിലിന് പരാതി നൽകാമെന്നുമാത്രം. മുസ്ളിം അംഗങ്ങൾ മാത്രമുള്ള കൗൺസിൽ തീരുമാനം അന്തിമമാണ്.

തമിഴ്നാട്ടിലെ തിരുച്ചിറപ്പള്ളിയിൽ 1500 വർഷം പഴക്കമുള്ള സുന്ദരേശ്വരാർ ക്ഷേത്രമുൾപ്പെടെയുള്ള തിരുച്ചെന്തുറൈ ഗ്രാമം അങ്ങനെ അപ്പാടെ വഖഫ് സ്വത്തായി. തിരുച്ചെന്തുറൈയും മുനമ്പവും ചില ഉദാഹരണങ്ങൾ മാത്രമാണ്. ഇങ്ങനെയാണ് ഇന്ത്യയിലെ ഏറ്റവും വലിയ ഭൂഉടമകളിൽ ഒന്നായി വഖഫ് ബോർഡ് മാറിയത്. ഇന്ത്യൻ റെയിൽവേയും സൈന്യവും കഴിഞ്ഞാൽ രാജ്യത്ത് ഏറ്റവുമധികം ഭൂമിയുള്ളത് വഖഫ് ബോർഡിനാണ്- 87 ലക്ഷം വസ്തുക്കളിലായി 9.4 ലക്ഷം ഏക്കർ. ലോകത്ത് ഏറ്റവുമധികം വഖഫ് ഭൂമിയുള്ള രാജ്യവും ഇന്ത്യയത്രെ. ആർക്കിയോളജിക്കൽ സർവേ ഒഫ് ഇന്ത്യയുടെ പക്കലുള്ള ലോകാത്ഭുതങ്ങളിലൊന്നായ താജ് മഹൽ പോലും ഉത്തർപ്രദേശ് സുന്നി വഖഫ് ബോർഡിന്റെ കണക്കനുസരിച്ച് അവരുടേതാണ്. ഈ പ്രശ്നം ഇപ്പോൾ സുപ്രീം കോടതിക്കു മുന്നിലാണ്.

എറണാകുളം ജില്ലയുടെ വടക്കേയറ്റത്ത് വൈപ്പിൻകരയി​ൽ,​ കടലിനോടു ചേർന്ന് മുനമ്പം, ചെറായി, പള്ളിക്കൽ ദ്വീപ് മേഖലയിലാണ് കേരളം കണ്ടി​ല്ലെന്നു നടി​ക്കുന്ന 104 ഏക്കർ ഭൂമി​യി​ലെ 614 കുടുംബങ്ങൾ വഖഫിന്റെ പേരിൽ അനുഭവി​ക്കുന്ന ദുരി​തം. സാധാരണക്കാരി​ൽ സാധാരണക്കാരായ മത്സ്യത്തൊഴി​ലാളി​കളാണ് ഇവരി​ൽ ഏറി​യ പങ്കും. ക്രൈസ്തവരി​ലെ പി​ന്നാക്കക്കാരായ ലത്തീൻ സഭക്കാർക്കാണ് അംഗബലം. ഇരുന്നൂറോളം പേർ ഈഴവ, ധീവര, കുഡുംബി, പട്ടി​കജാതി​ കുടുംബങ്ങളാണ്. വഖഫ് രേഖാപരമായി​ സ്വന്തമാക്കി​യ ഈ ഭൂമി​യി​ൽ ഒരു മുസ്ളിം മതവിശ്വാസി മാത്രമാണ് താമസം. ഏതാനും ചിലർക്ക് ഭൂസ്വത്തുണ്ടെന്നു മാത്രം.

2022 മുതൽ ഇവി​ടെ ഭൂഉടമകൾക്ക് കരമടയ്ക്കാനാവി​ല്ല. അതുകൊണ്ടുതന്നെ ഭൂപണയ വായ്പകൾ ലഭിക്കി​ല്ല. വി​വാഹ, വി​ദ്യാഭ്യാസ, ചി​കി​ത്സാ ആവശ്യങ്ങൾ മുടങ്ങി കണ്ണീരിലായവർ നിരവധി. പുതിയ വീടുവയ്ക്കാൻ അനുമതിയില്ല. വി​ലകൊടുത്തു വാങ്ങി​യ ഭൂമി​യി​ലെ കി​ടപ്പാടം വിട്ടുകൊടുത്ത്,​ വെറുംകൈയുമായി​ റോഡി​ലേക്ക് ഇറങ്ങേണ്ടി​ വരുമോയെന്ന ഭയത്തി​ലാണ് പ്രദേശവാസി​കൾ. ക്രി​സ്ത്യൻ പള്ളി​യും വൈദികമഠവും കോൺവെന്റും സെമി​ത്തേരി​യും അമ്പലവും ഇവി​ടെയുണ്ട്. പള്ളി​പ്പുറം പഞ്ചായത്ത് വക രണ്ട് ടാർ റോഡുകളും പാലങ്ങളും പണി​തി​ട്ടുണ്ട്. രണ്ട് ബാർ ഹോട്ടലുകളും ഇരുപതോളം റിസോർട്ടുകളും ഹോംസ്റ്റേകളും പ്രവർത്തിക്കുന്നു.

ഗുജറാത്തി​ൽ നി​ന്ന് കൊച്ചി​യി​ലേക്ക് കുടി​യേറി​യ അബ്ദുൽ സത്താർ മൂസ ഹാജി സേട്ടിന് 1902ൽ തി​രുവി​താംകൂർ മഹാരാജാവ് കൃഷി​ക്കായി​ പാട്ടത്തി​നു നൽകി​യ 464 ഏക്കർ ഭൂമി​യി​ൽ കടലെടുത്തതി​ന്റെ ബാക്കി​യാണ് ഇപ്പോഴുള്ള 104 ഏക്കർ കരഭൂമിയും 60 ഏക്കർ വെള്ളക്കെട്ടും. 1948ൽ ഭൂമി​ അദ്ദേഹത്തി​ന്റെ പി​ൻഗാമി​ സിദ്ദിഖ് സേട്ടി​ന്റെ പേരി​ലായി​. 1950ൽ സേട്ട് കോഴി​ക്കോട്ടെ ഫാറൂഖ് കോളേജി​ന്റെ ആവശ്യങ്ങൾക്കായി ക്രയവിക്രയാധികാരങ്ങളോടെ ദാനം നൽകി​. കോളേജ് ഇല്ലാതായാൽ കുടുംബത്തി​ന് മടക്കി​നൽകണമെന്നും വ്യവസ്ഥയുണ്ട്. പിന്നീട് ഭൂമിയെച്ചൊല്ലി കോളേജുമായി ഭൂമിയിലെ കുടികിടപ്പുകാർ വ്യവഹാരങ്ങൾ നടത്തിയെങ്കിലും വിജയിച്ചില്ല.

34 വർഷത്തെ നിയമയുദ്ധത്തിനു ശേഷം ഫാറൂഖ് കോളേജ് മാനേജ്‌മെന്റിൽ നിന്ന് കുടികിടപ്പുകാർ വിലകൊടുത്ത് ഭൂമി വാങ്ങി. 1989 മുതൽ 1993 വരെ കോളേജിന്റെ മാനേജിംഗ് കൗൺസിൽ സെക്രട്ടറി ഹസൻകുട്ടി സാഹിബ് ഒപ്പിട്ട 280-ഓളം ആധാരങ്ങൾ ഈ ഭൂമിയുമായി ബന്ധപ്പെട്ട് രജിസ്റ്റർ ചെയ്യപ്പെട്ടു. അതിനു ശേഷം വിറ്റതും അനന്തരാവകാശികൾക്ക് കൈമാറിയതുമായ ആയിരത്തോളം രജിസ്ട്രേഷനും നടന്നിട്ടുണ്ട്.

ആധാരത്തി​ൽ വഖഫ് എന്ന വാക്കുണ്ടെന്നതി​ന്റെ പേരി​ൽ എറണാകുളത്തെ വഖഫ് സംരക്ഷണ സമി​തി എന്ന സംഘടനയാണ് ഭൂമി​ വഖഫ് സ്വത്ത് ആക്കാൻ നി​യമയുദ്ധം നടത്തുന്നത്. വഖഫ് ചെയ്യപ്പെട്ട വസ്തുവി​ന് ക്രയവി​ക്രയാധി​കാരങ്ങളി​ല്ല. ഭൂമിയിൽ വഖഫ് ബോർഡ് അവകാശം ഉന്നയിക്കുന്നത് 2019ലാണ്. ബോർഡ് റവന്യൂ വകുപ്പിന് കത്തു നൽകിയതിനെ തുടർന്ന് 2022 മുതൽ ഉടമകൾക്ക് കരം അടയ്ക്കാൻ കഴിയുന്നില്ല. ഹൈക്കോടതി സിംഗിൾബെഞ്ച് കരം സ്വീകരിക്കാൻ വിധിച്ചെങ്കിലും ഡിവിഷൻ ബെഞ്ച് സ്റ്റേ ചെയ്തു. ഇതുമായി ബന്ധപ്പെട്ട് ആറ് കേസുകൾ ഹൈക്കോടതി മുമ്പാകെയുണ്ട്. ഇറക്കിവിടാൻ അനുവദിക്കില്ലെന്ന് സി.പി.എമ്മുകാരനായ സ്ഥലം എം.എൽ.എയും കോൺഗ്രസുകാരനായ എം.പിയും ഇവർക്ക് ഉറപ്പു നൽകുന്നുണ്ടെങ്കിലും വഖഫ് നിയമത്തിൽ ഭേദഗതി വരുത്താതെ ഭൂമിയുടെ ഉടമസ്ഥാവകാശം തിരികെ ലഭിക്കുക അസാദ്ധ്യമെന്നുതന്നെ പറയണം.

ഇത്തരം അന്യായമായവും ഭരണഘടനാവിരുദ്ധവുമായ വ്യവസ്ഥകൾ ഒഴിവാക്കുന്നതുൾപ്പെടെയാണ് കേന്ദ്രസർക്കാർ കൊണ്ടുവന്ന വഖഫ് നിയമഭേദഗതി ബിൽ. ഇതിനെതിരെ കേരള നിയമസഭയിൽ ഭരണപക്ഷം കഴിഞ്ഞ ദിവസം അവതരിപ്പിച്ച പ്രമേയം ഐകകണ്ഠ്യേനയാണ് പാസാക്കിയത്. മുനമ്പം വിഷയത്തെ ബാധിക്കുന്ന കാര്യത്തിൽ നിർദേശങ്ങളൊന്നുമുണ്ടായതുമില്ല. മുസ്ളിങ്ങളുടെ മൗലികാവകാശങ്ങളെ ഹനിക്കുന്ന എന്തെങ്കിലും നിർദേശങ്ങൾ വഖഫ് ഭേദഗതി ബില്ലിൽ ഉണ്ടെങ്കിൽ അതിനെ എതിർക്കുക തന്നെ വേണം. അതുപോലെതന്നെ മറ്റു മതസ്ഥരുടെയും പൗരന്മാരുടെയും അവകാശങ്ങളെ ഹനിക്കുന്ന വഖഫ് നിയമങ്ങളെയും ചോദ്യം ചെയ്യണം. അതിനുള്ള ധൈര്യം കേരളത്തിലെ ഭരണ, പ്രതിപക്ഷ കക്ഷികളിൽ ആർക്കുമുണ്ടായില്ല. മുസ്ളിം വോട്ടുബാങ്കിനെ ഭയന്ന് അവർ മുട്ടിലിഴഞ്ഞു.

വഖഫ് ചെയ്യപ്പെട്ട വസ്തുവി​ൽ മറ്റാർക്കെങ്കി​ലും എന്തെങ്കി​ലും രീതി​യി​ലുള്ള അവകാശം നി​ലനി​ൽക്കുന്നുണ്ടോ എന്നു പരി​ശോധി​ക്കാതെ, നി​യമപരി​ഹാര സാദ്ധ്യതകൾ നി​ഷേധിച്ച് മതസ്വത്താക്കുന്ന സംവി​ധാനം ഭരണഘടനാ വി​രുദ്ധവും രാജ്യത്തി​ന്റെ മതേതര മൂല്യങ്ങൾ ചോദ്യം ചെയ്യപ്പെടുന്നതുമാണ്. നീതി​ന്യായ വ്യവസ്ഥയി​ൽ സാമാന്യജനങ്ങൾക്ക് വി​ശ്വാസം വരണമെങ്കി​ൽ ഏതൊരു തീരുമാനവും, ശരി​യാണെങ്കി​ലും തെറ്റാണെങ്കി​ലും നി​യമത്തി​നു മുന്നി​ൽ ചോദ്യം ചെയ്യാനുള്ള അവകാശം പൗരന് ലഭ്യമാകണം. ആ അവകാശം നി​ഷേധി​ക്കുന്ന നി​യമവ്യവസ്ഥയെ ജനാധി​പത്യവി​ശ്വാസി​കൾക്ക് അംഗീകരി​ക്കാനാവി​ല്ല. ഭരണഘടനയ്ക്കും നീതി​ന്യായ വ്യവസ്ഥിതി​ക്കും മുകളി​ൽ മതത്തെ പ്രതി​ഷ്ഠി​ക്കുന്നത് മതേതരത്വത്തി​നും ജനാധി​പത്യത്തി​നും യോജി​ച്ചതല്ല.