കൊച്ചി: ഹിന്ദുത്വ രാഷ്ട്രീയത്തിന് രാജ്യത്ത് ഇടമില്ലെന്ന് സാമൂഹ്യ പ്രവർത്തകൻ കെ. വേണു പറഞ്ഞു. മഹാത്മാഗാന്ധി കോൺഗ്രസ് പ്രസിഡന്റായതിന്റെ നൂറാം വാർഷികാഘോഷ പരിപാടികളുടെ ഭാഗമായി ഭിന്നിപ്പിന്റെ വർഗീയമാർഗം, ചേർത്തുനിറുത്തലിന്റെ ഗാന്ധിമാർഗം എന്ന വിഷയത്തിൽ എറണാകുളം ഡി.സി.സിയുടെയും സബർമതി പഠന ഗവേഷണ കേന്ദ്രത്തിന്റെയും നേതൃത്വത്തിൽ നടത്തി​യ സെമിനാറിൽ സംസാരിക്കുകയായിരുന്നു അദ്ദേഹം.

ജനാധിപത്യത്തിനുവേണ്ടി വാദിക്കുന്ന എല്ലാവർക്കും ഇന്ത്യയുടെ മുന്നോട്ടുപോക്കിൽ ആശങ്കയുണ്ട്. അപ്പോഴും ആശ്വാസം പകരുന്നതായിരുന്നു കഴിഞ്ഞ ലോക്‌സഭാ തി​രഞ്ഞെടുപ്പ് ഫലം. അത്ര എളുപ്പത്തിൽ രാജ്യത്തെ മോദിക്കും കൂട്ടർക്കും സ്വന്തമാക്കുവാൻ കഴിയില്ലെന്ന സന്ദേശം കഴിഞ്ഞ തി​രഞ്ഞെടുപ്പ് പകർന്നു നൽകിയെന്ന് വേണു പറഞ്ഞു. ഡി.സി.സി പ്രസിഡന്റ് മുഹമ്മദ് ഷിയാസ് അദ്ധ്യക്ഷനായി​.

മാത്യു കുഴൽനാടൻ എം.എൽ.എ, കെ.പി. ധനപാലൻ, ഡോമനിക് പ്രന്റേഷൻ, ഡോ.എം.സി. ദിലീപ്കുമാർ, ഡോ.ടി.എസ്. ജോയി, ഷൈജു കേളന്തറ തുടങ്ങിയവർ സംസാരിച്ചു.