മട്ടാഞ്ചേരി: സി.എസ്.എം.എൽ നിർമാണം മൂലം റോഡിന് വീതി കുറഞ്ഞതായി പരാതി. ഫോർട്ട്കൊച്ചി റോ റോ ജെട്ടിക്ക് മുതൽ ആസ്പിൻ വാൾ ജംഗ്ഷൻ വരെയുള്ള റോഡിന്റെ നിർമാണത്തിലാണ് പരാതി ഉയർന്നിരിക്കുന്നത്. നിലവിൽ റോ റോയിലേക്ക് കയറാനുള്ള കാർ ഉൾപ്പെടെയുള്ള വാഹനങ്ങൾ ഊഴം കാത്ത് കിടക്കുന്നത് ഈ റോഡരികിലാണ്. നേരത്തേ തന്നെ ഈ റോഡിലൂടെ വാഹനങ്ങൾ കടന്ന് പോകുന്നതിന് പ്രയാസം നേരിട്ടിരുന്നു. ഇപ്പോൾ നടപ്പാതയിൽ നിന്ന് ഒരടി കൂടി വിട്ടാണ് റോഡിൽ കല്ല് സ്ഥാപിക്കുന്നത്. ഇതോടെ ഇപ്പോഴുള്ള റോഡിന്റെ വീതി വീണ്ടും കുറയുന്ന സാഹചര്യമാണെന്നാണ് പരാതി. ടൂറിസം മേഖലയായ ഈ ഭാഗത്തെ ഹോട്ടലുകളിലേക്കും നിരവധി വാഹനങ്ങളാണ് വരുന്നത്.റോഡിന് വീതി കുറയുന്നതോടെ വാഹനങ്ങൾ നിരങ്ങി പോകുന്ന സാഹചര്യവും അപകടങ്ങളുണ്ടാകാനുള്ള സാധ്യതയുമുണ്ട്. അശാസ്ത്രീയമായ നിർമ്മാണ പ്രവൃത്തികൾ മൂലം ഇവിടെ ഗതാഗത കുരുക്കും പതിവായി മാറിയിരിക്കുകയാണ്.ഏതാണ്ട് ഒരു വർഷത്തോളമായി ഇവിടെത്തെ റോഡ് നിർമാണ ജോലികൾ ഇഴഞ്ഞ് നീങ്ങുന്ന അവസ്ഥയാണ്. റോഡിന് വീതി കുറയുന്ന സാഹചര്യം ഒഴിവാക്കാൻ നടപടി വേണമെന്ന ആവശ്യം ഉയർന്നിട്ടുണ്ട്.