മൂവാറ്റുപുഴ: സംസ്ഥാന ഫിഷറീസ് വകുപ്പിന്റെ ജനകീയ മത്സ്യകൃഷിയുടെ ഭാഗമായി പൊതുകുളങ്ങളിൽ മത്സ്യകൃഷി പ്രോത്സാഹിപ്പിക്കുന്ന പദ്ധതിക്ക് മൂവാറ്റുപുഴ ബ്ലോക്ക് പഞ്ചായത്തിന്റെ സഹകരണത്തോടെ തുടക്കമായി. മഞ്ഞള്ളൂർ പഞ്ചായത്തിലെ വാഴക്കുളം ചിറയിൽ മീൻകുഞ്ഞുങ്ങളെ നിക്ഷേപിച്ച് മൂവാറ്റുപുഴ ബ്ലോക്ക് പ്രസിഡന്റ് കെ.ജി. രാധാകൃഷ്ണൻ ഉദ്ഘാടനം ചെയ്തു. മീനുകളെ സംരക്ഷിക്കുന്നതിന് മോണിട്ടറിംഗ് സമിതിയെ ഓരോ കുളത്തിലും ഏർപ്പെടുത്തിയിട്ടുണ്ട്. വിഷരഹിത മത്സ്യം ലഭ്യമാക്കുക എന്ന ലക്ഷ്യത്തോടെയാണ് പദ്ധതി നടപ്പിലാക്കുന്നത്. വളർച്ചയെത്തിയ മീനുകൾ വിളവെടുപ്പ് നടത്തി ലേലം ചെയ്ത് വിൽക്കും. ഗ്രാമപഞ്ചായത്ത് പ്രസിഡന്റ് ആൻസി ജോസ് അദ്ധ്യക്ഷയായി. ബ്ലോക്ക് പഞ്ചായത്ത് വൈസ് പ്രസിഡന്റ് ജോസി ജോളി,​ ബ്ലോക്ക് മെമ്പർമാരായ മേഴ്സി ജോർജ്,ബെസ്റ്റിൻ ചേറ്റൂർ, ഗ്രാമപഞ്ചായത്ത് വൈസ് പ്രസിഡന്റ് ടോമി തന്നിട്ടാമാക്കൽ, പഞ്ചായത്ത് അംഗങ്ങളായ ജോസ് മാത്യു, പി.എസ്. സുധാകരൻ, ഫിഷറീസ് എക്സ്റ്റൻഷൻ ഓഫീസർ കെ.ബി. സ്മിത,​ പ്രമോട്ടർമാരായ ബിന്ദു പോൾ, ഷിബി ഐസക് തുടങ്ങിയവർ പങ്കെടുത്തു.

മൂവാറ്റുപുഴ ബ്ലോക്ക് പഞ്ചായത്ത് പരിധിയിലുള്ള എട്ട് ഗ്രാമപഞ്ചായത്തുകളിലെ തിരഞ്ഞെടുത്ത 62 കുളങ്ങളിലാണ് പദ്ധതി നടപ്പാക്കുന്നത്. ദ്രുതഗതിയിൽ വളർച്ച നേടുന്നതും കുളങ്ങളിൽ സ്വാഭാവികമായുള്ള പായലും മറ്റും ഭക്ഷിക്കുന്ന കട്ടള, രോഹു,​ മൃഗാൾ, ഗ്രാസ്, കാർപ്പ് ഇനങ്ങളിൽപ്പെട്ട 53,310 മത്സ്യക്കുഞ്ഞുങ്ങളെയാണ് നിക്ഷേപിച്ചത്.