കട്ടപ്പന: കെ.പി.എം.എസ് ജില്ലാ നേതൃയോഗം ആറിന് കട്ടപ്പന നഗരസഭ കോൺഫറൻസ് ഹാളിൽ നടക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. യോഗം സംസ്ഥാന ജനറൽ സെക്രട്ടറി പുന്നല ശ്രീകുമാർ ഉദ്ഘാടനം ചെയ്യും. പട്ടിജാതിപട്ടികവർഗ സംവരണത്തിൽ മേൽത്തട്ട് പരിധി നിശ്ചയിക്കുന്നതിനുള്ള അധികാരം സംസ്ഥാനങ്ങൾക്ക് നൽകികൊണ്ടുള്ള ആഗസ്റ്റ് ഒന്നിലെ സുപ്രീംകോടതി വിധി രാജ്യത്തെ പട്ടികജാതി പട്ടികവർഗ വിഭാഗങ്ങളുടെ ഇടയിൽ വലിയ ആശങ്കയാണ് ഉണ്ടായിരിക്കുന്നത്. ഈ വിധിയെ മറികടക്കാൻ കേന്ദ്രസർക്കാരും ഈ വിധി
നടപ്പാക്കാതിരിക്കാൻ സംസ്ഥാന സർക്കാരും തയ്യാറാകണമെന്നും ആവശ്യപ്പെട്ടുകൊണ്ട് കെ.പി.എം.എസ് പ്രക്ഷോഭത്തിനൊരുങ്ങുകയാണ്. സംഘടനയെ സമര സജ്ജമാക്കാനും നയപരിപാടികൾ വിശദീകരിക്കുന്നതിനുമായി സംസ്ഥാനത്ത് എല്ലാ ജില്ലകളിലും നേത്യസംഗമങ്ങൾ ചേരുന്നതിന്റെ ഭാഗമായാണ് കട്ടപ്പനയിലും യോഗം ചേരുന്നത്. സംസ്ഥാന അസി. സെക്രട്ടറി പി.വി. ബാബു അദ്ധ്യക്ഷനാകും. സെക്രട്ടറിയേറ്റ് അംഗം സാബു കൃഷ്ണൻ, സംസ്ഥാന കമ്മിറ്റി അംഗങ്ങളായ
കെ.കെ. രാജൻ, സുനീഷ് കുഴിമറ്റം, ശിവൻ കോഴിക്കമാലി, കെ.ടി. മോഹനൻ എന്നിവർ സംസാരിക്കും. ജില്ലയിലെ അഞ്ച് താലൂക്ക് യൂണിയനുകളിൽ നിന്നുമായി 357
പ്രതിനിധികൾ പങ്കെടുക്കും. അസിസ്റ്റന്റ് സെക്രട്ടറി പി.വി. ബാബു, സെക്രട്ടറിയേറ്റ്
അംഗം സാബു കൃഷ്ണൻ, സംസ്ഥാന കമ്മിറ്റി അംഗങ്ങളായ കെ.കെ. രാജൻ,​ സുനീഷ് കുഴിമാറ്റം,​ ശിവൻ കോഴിക്കമാലി എന്നിവർ പങ്കെടുത്തു.