അടിമാലി: എസ് .എൻ .ഡി .പി വൊക്കേഷണൽ ഹയർസെക്കണ്ടറി സ്‌കൂളിൽ സ്‌കിൽ എക്സിബിഷൻ നാളെ നടക്കുമെന്ന് സ്‌കൂൾ അധികൃതർ അറിയിച്ചു. സൃഷ്ടി റ്റുകെ24എന്ന പേരിലാണ് സ്‌കിൽ എക്സിബിഷൻ സംഘടിപ്പിക്കുന്നത്.വിവിധ സാങ്കേതിക മുന്നേറ്റങ്ങൾ പ്രദർശിപ്പിക്കുകയെന്നതാണ് എക്സിബിഷന്റെ ലക്ഷ്യം.സ്‌കൂളിലെ ഇലക്ട്രിക്കൽ, മെക്കാനിക്കൽ,ഓട്ടോ മൊബൈൽ കോഴ്സുകളിൽ പഠിക്കുന്ന വിദ്യാർത്ഥികൾ തയ്യാറാക്കിയ നൂതന കണ്ടുപിടുത്തങ്ങളും പോലീസ്, ഫയർഫോഴ്സ്, കെ എസ് ഇ ബി തുടങ്ങി വിവിധ വകുപ്പുകളുടെ സ്റ്റാളുകളും എക്സിബിഷന്റെ ഭാഗമായി ഒരുക്കും.എക്സിബിഷൻ ജില്ലാ കളക്ടർ വി. വിഘ്‌നേശ്വരി ഉദ്ഘാടനം ചെയ്യും.സാങ്കേതിക മേഖലയിൽ ഉപരി പഠന തൊഴിൽ സാധ്യത മുൻനിർത്തി തുടർ വിദ്യാഭ്യാസം ലക്ഷ്യമിടുന്ന വിവിധ കോളേജുകളുടെ ടെക് കരിയർ ഫെസ്റ്റും എക്സിബിഷന്റെ ഭാഗമായി നടക്കും.വിദ്യാർത്ഥികളും പൊതുജനങ്ങളും ഉൾപ്പെടെ നാലായിരത്തോളം ആളുകൾ സന്ദർശകരായി എത്തുമെന്നാണ് പ്രതീക്ഷ.എക്സിബിഷനിലേക്കുള്ള പ്രവേശനം സൗജന്യമാണ്. എൻ എസ് എസ് യൂണിറ്റ്, കുടുംബശ്രീ എന്നിവയുടെ നേതൃത്വത്തിൽ ഭക്ഷണശാലകളും ക്രമീകരിക്കും. പരിപാടിയുടെ ഭാഗമായി നാളെ വൈകിട്ട് ശ്വാന പ്രദർശനവും ഓട്ടോ എക്സ്‌പോയും ഒരുക്കിയിട്ടുണ്ടെന്നും സ്‌കൂൾ പ്രിൻസിപ്പാൾ എം എസ് അജി, എം ഷീബ, രാജേഷ് കെ, അജയ് ബി എന്നിവർ പറഞ്ഞു.