തൊടുപുഴ: ഗാന്ധിനഗർ വൃന്ദാവനിലെ ശാന്തകുമാരിയുടെ സത്യസന്ധതയ്ക്ക് പൊന്നിനേക്കാൾ തിളക്കം. കളഞ്ഞു കിട്ടിയ അര പവനോളം തൂക്കമുള്ള സ്വർണ്ണാഭരണം തിരികെ പൊലീസ് സ്റ്റേഷനിൽ എൽപ്പിച്ച വീട്ടമ്മ സത്യസന്ധതയുടെ ആൾരൂപമായി. ബുധനാഴ്ച രാവിലെ ക്ഷേത്ര ദർശനം കഴിഞ്ഞ് നടന്നു വരുമ്പോഴാണ് തൊടുപുഴ പാർക്കിന് സമീപം വഴിയരികിൽ സ്വർണ്ണാഭരണം കിടക്കുന്നത് കണ്ടത്. ഉടൻ തന്നെ തൊട്ടടുത്തുള്ള പൊലീസ് സ്റ്റേഷനിലെ പി.ആർ.ഒ അനിൽകുമാറിനെ ഏൽപ്പിച്ചു. സ്വർണ്ണത്തിന് മാനംമുട്ടെ വില ഉയർന്നു നിൽക്കുന്ന സാഹചര്യത്തിലും ശാന്തകുമാരി കാണിച്ച സത്യസന്ധതയെ പൊലീസ് ഉദ്യോഗസ്ഥർ അഭിനന്ദിച്ചു.