തൊടുപുഴ: മുതലക്കോടം ജയ്‌ ഹിന്ദ് ലൈബ്രറിയുടെ ആഭിമുഖ്യത്തിൽ സംഘടിപ്പിക്കുന്ന അഞ്ചാമത് നാടകോത്സവം 20 മുതൽ 22 വരെ തൊടുപുഴ ടൗൺഹാളിൽ നടക്കുമെന്ന് ലൈബ്രറി ഭാരവാഹികൾ വാർത്താസമ്മേളനത്തിൽ അറിയിച്ചു. നാടകോത്സവത്തിന്റെ ഉദ്ഘാടനം 20ന് വൈകിട്ട് 5.30ന് ജില്ലാ ലൈബ്രറി കൗൺസിൽ പ്രസിഡന്റ് ആർ. തിലകൻ നിർവഹിക്കും. സംസ്ഥാന ലൈബ്രറി കൗൺസിൽ സംസ്ഥാന എക്സിക്യൂട്ടീവംഗം കെ.എം. ബാബു അദ്ധ്യക്ഷത വഹിക്കും. ചടങ്ങിൽ നാടക പ്രവർത്തകരായ ഡി. മൂക്കൻ, തൊടുപുഴ ചാക്കപ്പൻ, പൂജ ആന്റണി എന്നിവരെ ആർട്ടിസ്റ്റ് സുജാതൻ ആദരിക്കും. മുനിസിപ്പൽ ചെയർപേഴ്സൺ സബീന ബിഞ്ചു, കൗൺസിലർമാരായ ജോസഫ് ജോൺ, സനു കൃഷ്ണൻ, ജിതേഷ് ഇഞ്ചക്കാട്ട്, ലൈബ്രറി പ്രസിഡന്റ് കെ.സി. സുരേന്ദ്രൻ, സെക്രട്ടറി പി.വി. സജീവ് എന്നിവർ പ്രസംഗിക്കും. എല്ലാ ദിവസവും വൈകിട്ട് ഏഴിന് നാടകം ആരംഭിക്കും. ആദ്യ ദിവസം അമ്പലപ്പുഴ അക്ഷര ജ്വാലയുടെ അനന്തരം, രണ്ടാം ദിവസം തിരുവനന്തപുരം സാഹിതി തിയേറ്റേഴ്സിന്റെ മുച്ചീട്ട് കളിക്കാരന്റെ മകൾ, സമാപന ദിവസം കോഴിക്കോട് രംഗഭാഷയുടെ മിഠായി തെരുവ് എന്നീ നാടകങ്ങൾ അരങ്ങേറും. ഒരു നാടകത്തിന് 200 രൂപയാണ് പ്രവേശന പാസ് നിരക്ക്. വാർത്താസമ്മേളനത്തിൽ ലൈബ്രറി പ്രസിഡന്റ് കെ.സി. സുരേന്ദ്രൻ, സെക്രട്ടറി പി.വി. സജീവ്, ഭാരവാഹികളായ ജോസ് തോമസ്, എ.പി. കാസിം, വിനോദ് പുഷ്പാംഗദൻ എന്നിവർ പങ്കെടുത്തു.