ഇടുക്കി: ആടുകളെ ബാധിക്കുന്ന മാരക വൈറസ് രോഗമായ ആടുവസന്തയ്‌ക്കെതിരെ മൃഗസംരക്ഷണ വകുപ്പ് കുത്തിവെയ്പ്പ് യജ്ഞം ആരംഭിച്ചു. വായുവിലൂടെ പകരുന്ന ഈ രോഗത്തെ പ്രതിരോധകുത്തിവെയ്പ്പിലൂടെ മാത്രമേ നിയന്ത്രിക്കാൻ സാധിക്കൂ. ജില്ലയിൽ 102432 ആടുകളുണ്ടെന്നാണ് കണക്ക്. നാല് മാസത്തിന് മുകളിൽ പ്രായമുള്ളവയ്ക്കാണ് കുത്തിവെയ്പ്പ് നൽകുക. വാക്സിനേഷനായി രൂപീകരിച്ചിരിക്കുന്ന സ്‌ക്വാഡുകൾ വീടുകളിലെത്തി സൗജന്യമായി നവംബർ അഞ്ച് വരെ കുത്തിവയ്പ്പ് നൽകും. കർഷകർ സംശയനിവാരണത്തിനായി അതത് മൃഗാശുപത്രികളുമായി ബന്ധപ്പെടേണ്ടതാണെന്ന് ജില്ലാ മൃഗസംരക്ഷണ ഓഫീസർ അറിയിച്ചു.