മൂന്നാർ: പഴയ മൂന്നാർ ലക്ഷ്മി റോഡ് തകർന്ന് കിടക്കുന്നതിൽ പ്രതിഷേധിച്ച് കോൺഗ്രസ് പ്രവർത്തകർ റോഡിൽ ശയനപ്രദക്ഷിണം നടത്തി .പ്രദേശവാസികളും വിനോദസഞ്ചാരികളും ഒരേ പോലെ ഉപയോഗിക്കുന്ന റോഡാണ് പഴയ മൂന്നാർ ലക്ഷ്മി റോഡ്.എസ്‌റ്റേറ്റ് മേഖലകളിലൂടെ സഞ്ചരിച്ച് മാങ്കുളത്തേക്കെത്തുന്ന റോഡാണിത്.ദിവസവും നിരവധി വാഹനങ്ങളാണ് ഇതുവഴി കടന്നു പോകുന്നത്.പഴയ മൂന്നാർ മൂലക്കട മുതൽ ലക്ഷ്മി വരെയുള്ള തകർന്ന് കിടക്കുന്ന റോഡ് യാത്രാ യോഗ്യമാക്കണമെന്നാവശ്യപ്പെട്ടാണ് കോൺഗ്രസ് പ്രവർത്തകർ.മൂന്നാറിൽ റോഡിൽ ശയനപ്രദക്ഷിണം നടത്തി പ്രതിഷേധിച്ചത്. കോൺഗ്രസ് പ്രവർത്തകരുടെ പ്രതിഷേധ സമരം മുൻ എം.എൽ.എ എ.കെ. മണി ഉദ്ഘാടനം ചെയ്തു. കൃത്യമായ അറ്റകുറ്റപ്പണികളുടെ അഭാവത്താലാണ് റോഡിങ്ങനെ തകർന്ന് കിടക്കുന്നതെന്നാണ് ആക്ഷേപം.മഴ കുറഞ്ഞ സാഹചര്യത്തിൽ റോഡിന്റെ നിർമ്മാണ ജോലികൾ നടത്തണമെന്നാണ് പ്രതിഷേധക്കാരുടെ ആവശ്യം.കോൺഗ്രസ് മൂന്നാർ മണ്ഡലം കമ്മിറ്റിയുടെ നേതൃത്വത്തിലായിരുന്നു പ്രതിഷേധ സമരം .മണ്ഡലം പ്രസിഡന്റ് സി നെൽസൺ അദ്ധ്യക്ഷത വഹിച്ചു.കോൺഗ്രസ് ബ്ലോക്ക് പ്രസിഡന്റ് വിജയകുമാര്‍, ജി. മുനിയാണ്ടി, ഡി .കുമാർ, മാർഷ് പീറ്റർ, റിയാസ്, മൂന്നാർ പഞ്ചായത്ത് പ്രസിഡന്റ് ദീപ, വൈസ് പ്രസിഡന്റ് ബാലചന്ദ്രൻ തുടങ്ങിയവർ പങ്കെടുത്തു.