ഇടുക്കി: ഭൂഗർഭജലത്തിന്റെ അളവ് കുറഞ്ഞ് വരുന്ന ഈ കാലഘട്ടത്തിൽ ജലത്തിന്റെ പ്രാധാന്യം സംബന്ധിച്ച അറിവ് പരമാവധി ജനങ്ങളിലേക്ക് എത്തേണ്ടതുണ്ടെന്ന് ജലവിഭവ മന്ത്രി റോഷി അഗസ്റ്റിൻ . ഭൂജലസ്രോതസുകളുടെ സമ്പൂർണ്ണ വിവരശേഖരണ പരിപാടിയായ വെൽ സെൻസസിന്റെ സംസ്ഥാനതല ഉദ്ഘാടനം തോപ്രാംകുടിയിൽ നിർവഹിക്കുകയായിരുന്നു അദ്ദേഹം. നിലവിലെ ജലസ്രോതസുകളെ മലിനമാക്കാതെ സംരക്ഷിക്കേണ്ട ചുമതല നമുക്കുണ്ട്. ഭൂഗർഭജലത്തിന്റെ അളവ് കുറഞ്ഞ് വരികയാണ്.അതുകൊണ്ടുതന്നെ ജലം പാഴാക്കാതിരിക്കാനും , മലിനമാക്കാതിരിക്കാനും നമ്മൾ ശ്രദ്ധിക്കേണ്ടതുണ്ടെന്നും മന്ത്രി പറഞ്ഞു.

സെൻസസ് പദ്ധതി പ്രകാരം പ്രത്യേക പരിശീലനം നേടിയ കുടുംബശ്രീ പ്രവർത്തകർവഴി 'നീരറിവ്' എന്ന മൊബൈൽ ആപ്പ് ഉപയോഗിച്ചാണ് വിവരങ്ങൾ ശേഖരിക്കുക. പ്രവർത്തകർ എല്ലാ വീടുകളിലും സ്ഥാപനങ്ങളിലും പൊതുഇടങ്ങളിലും നേരിട്ടെത്തി കിണറുകൾ ,കുഴൽ കിണറുകൾ, കുളങ്ങൾ, നീരുറവകൾ, സുരംഗം, ഓലി തുടങ്ങിയ എല്ലാ ഭൂജല സ്രോതസ്സുകളുടെയും വിവരങ്ങൾ ശേഖരിക്കും. കിണറിന്റെ സ്ഥാനം, ആകൃതി, ആഴം, ജലനിരപ്പ്, വരൾച്ചാ സാദ്ധ്യത, വെള്ളപ്പൊക്ക സാദ്ധ്യത, വെള്ളത്തിന്റെ ഗുണനിലവാരം, പ്രതിദിന ഉപഭോഗം, ഭൂമിയുടെ ഉപരിതല ഘടന, കിണറിന്റെ അടിതട്ടിലെ മണ്ണിന്റെ സവിശേഷത, ജലസ്രോതസ്സിൽ നിന്നും സെ്ര്രപിക് ടാങ്ക് , തൊഴുത്ത് എന്നിവിടങ്ങളിലേക്കുള്ള ദൂരം മുതലായ വിവരങ്ങളാണ് രേഖപ്പെടുത്തുക.പരിപാടിയിൽ ഭൂജലവകുപ്പ് ഡയറക്ടർ ഡി ധർമ്മലശ്രീ, സംസ്ഥാന റിമോട്ട് സെൻസിംഗ് ആൻഡ് എൻവിറോണ്മെന്റ് സെന്റർ ഡയറക്ടർ ഡോ അരുൺ എസ് നായർ , ത്രിതല പഞ്ചായത്ത് പ്രതിനിധികൾ തുടങ്ങിയവർ പങ്കെടുത്തു.