കട്ടപ്പന: റോഡിന് കുറുകെ താഴ്ന്ന് കിടന്ന സർവീസ് വയർ കഴുത്തിൽ കുരുങ്ങി സ്കൂട്ടർ യാത്രികനായ മദ്ധ്യവയസ്കന് ഗുരുതര പരിക്ക്. കുന്തളംപാറയിൽ വാടക വീട്ടിൽ താമസിക്കുന്ന മങ്ങാട്ട് തുണ്ടത്തിൽ ടി.എൻ. സുരേഷിനാണ് കഴുത്തിനും കാലിനും ഗുരുതര പരിക്കേറ്റത്. കഴിഞ്ഞ ഞായറാഴ്ച കട്ടപ്പന- കുന്തളംപാറ റോഡിലായിരുന്നു അപകടം. കുന്തളംപാറയിലെ വീട്ടിൽ നിന്ന് സ്കൂട്ടറിൽ കട്ടപ്പനയ്ക്ക് വരുന്നതിനിടെ റോഡിന് കുറുകെ താഴ്ന്ന് കിടന്നിരുന്ന സർവീസ് വയർ സുരേഷിൻ്റെ കഴുത്ത് കുരുങ്ങുകയായിരുന്നു. തുടർന്ന് വാഹനത്തിൻ്റെ നിയന്ത്രണം നഷ്ടപ്പെട്ട് റോഡിൽ വീണു. വീഴ്ചയിൽ കഴുത്തിനും കാലിനും ഗുരുതര പരിക്കേറ്റു. സർവീസ് വയർ റേഡിൻ്റെ വശത്തെ മരത്തിൽ കെട്ടിയിട്ട നിലയിലാണ് കിടന്നിരുന്നതെന്ന് സുരേഷ് പറഞ്ഞു. സംഭവുമായി ബന്ധപ്പെട്ട് കട്ടപ്പന പൊലീസിലും കെ.എസ്.ഇ.ബി കട്ടപ്പന സെക്ഷൻ ഓഫീസിലും പരാതി നൽകി. എന്നാൽ നടപടിയൊന്നും ഉണ്ടായില്ലെന്നും അദ്ദേഹം പറഞ്ഞു. ഇതിനിടയിൽ കെ.എസ്.ഇ.ബി അധികൃതർ രമ്യതയിൽ പ്രശ്നം തീർക്കാൻ ശ്രമിച്ചതായും അദ്ദേഹം പറഞ്ഞു. അപകടത്തെ തുടർന്ന് നിലവിൽ നടക്കാൻ പോലും തനിക്ക് കഴിയാത്ത സാഹചര്യമാണെന്നും തനിക്ക് ഉണ്ടായ കഷ്ട നഷ്ടത്തിന് കെ.എസ്.ഇ.ബിയുടെ ഭാഗത്ത് നിന്ന് പരിഹാരം കണ്ടത്തി തരണമെന്നുമാണ് സുരേഷ് ആവശ്യപെടുന്നത്. നിലവിൽ സുരേഷ് കട്ടപ്പനയിലെ സ്വകാര്യ ആശുപത്രിയിൽ ചികിത്സയിലാണ്.