കൊതുകുകൾക്കല്ല ഇനി നമുക്ക് ഇവിടെ ഉല്ലസിക്കാം

കട്ടപ്പന : നേതാജി ബൈപ്പാസ് ടൗൺഹാൾ ബൈപ്പാസ് റോഡിൽ ചിൽഡ്രൻസ് പാർക്ക് നിർമ്മിക്കുന്നതിന് ഹൗസിംഗ് ബോർഡിന്റെ സ്ഥലം വിട്ടു കിട്ടുന്നതിനായി ഹൗസിങ് ബോർഡിനോട് ആവശ്യടാൻ കൗൺസിൽ യോഗത്തിൽ തീരുമാനമായി . ഇതോടെ കൊതുകുകൾ പെരുകുന്ന വലിയൊരു കേന്ദ്രം ജനോപകാരപ്രദമായ ഇടമായി മാറും. കട്ടപ്പനയിൽ വിശ്രമ കേന്ദ്രത്തിന്റെ അഭാവവും ഇതോടെ പരിഹരിക്കപ്പെടുന്നു.
തണലിടം പദ്ധതിയിൽ ഉൾപ്പെടുത്തിയാണ് നഗരസഭയിൽ ചിൽഡ്രൻസ് പാർക്ക് എന്ന പദ്ധതിക്ക് അംഗീകാരം ലഭിച്ചിട്ടുള്ളത്. സ്ഥലം വിട്ടു നിൽക്കുന്ന നടപടികൾ പൂർത്തീകരിച്ച് പാർക്ക് നിർമ്മാണം ഉടൻ തുടങ്ങാമെന്ന പ്രതീക്ഷയിലാണ് അധികൃതർ.

കട്ടപ്പന നഗരത്തിലെത്തുന്നവർ വിശ്രമിക്കാൻ പ്രധാനമായും തിരഞ്ഞെടുക്കുന്ന ഒരു മേഖലയാണ് ബൈപ്പാസ് റോഡ്.കട്ടപ്പന നേതാജി ബൈപ്പാസ് ടൗൺഹാൾ ബൈപ്പാസ് റോഡുകൾ കൂടിച്ചേരുന്ന സ്ഥലമാണ് ഇവിടം. വർഷങ്ങൾക്കു മുൻപ് നട്ട തണൽമരങ്ങൾ തണുത്ത അന്തരീക്ഷവും പകർന്നു നൽകുന്നു. കൂടാതെ വാഹനങ്ങളുടെ തിരക്കും പാതയിൽ കുറവാണ്. അതുകൊണ്ടുതന്നെ നിരവധി ആളുകൾ ഉച്ചഭക്ഷണം കഴിക്കുന്നതിനും, ഡ്രൈവർമാർ അടക്കമുള്ള ആളുകൾ വിശ്രമിക്കുന്നതിനുംഇവിടം തിരഞ്ഞെടുക്കുന്നു.

=പാർക്ക് നിർമ്മിക്കുന്നതിന് ഏറ്റവും ഉതകുന്ന സ്ഥലം കൂടിയാണിത്. നിരവധി കല്യാണ ഫോട്ടോകൾക്കും, സിനിമ ചിത്രീകരണങ്ങൾക്കും ഇവിടം ലൊക്കേഷൻ ആയിട്ടുണ്ട്.

ആവെ്യം പരിഗണിച്ചു

എന്നാൽ പലപ്പോഴും വില്ലൻ ആയിട്ടുള്ളത് മാലിന്യ നിക്ഷേപമാണ്. അതുകൂടാതെ മേഖലയിൽ വലിയ വെള്ളക്കെട്ടും നിലനിൽക്കുന്നു. ഈ വെള്ളക്കെട്ടിൽ മാരകമായ കൊതുകുകളാണ് പെറ്റു പെരുകുന്നത് . ഈ സ്ഥിതിയും ഇവിടെ പാർക്ക് നിർമ്മിക്കണമെന്ന ആളുകളുടെ ആവശ്യവും കേരളകൗമുദി അധികാരികളിൽ എത്തിച്ചിരുന്നു. റോയൽ സിറ്റി റസിഡൻസ് അസോസിയേഷനും, അനശ്വര എസ് എച്ച് ജിയും മേഖലയിൽ അനുഭവപ്പെടുന്ന പ്രതിസന്ധിയും ഇവിടെ പാർക്ക് നിർമ്മിക്കണമെന്ന് ആവശ്യവും കാണിച്ച് ഉന്നത അധികാരികൾക്ക് നിവേദനം നൽകിയിരുന്നു.