ഫറോക്ക്​: ഫറോക്ക് ബി.ഇ.എം യു.പി സ്കൂൾ ഓഫീസ് കുത്തിത്തുറന്ന് ലാപ്ടോപ്പുകൾ മോഷ്ടിച്ച കേസിൽ പ്രതി പിടിയിൽ. നല്ലളം കിഴുവനപ്പാടം പുതുപ്പള്ളി മുഹമ്മദ് അഷറഫലിയാണ് (24) അറസ്റ്റിലായത്. പ്രതിയെ കോടതി റിമാൻഡ് ചെയ്തു.​ കഴിഞ്ഞ ആറിന് രാത്രിയാണ്​ സ്കൂൾ ഓഫീസിന്റെ പൂട്ട് തകർത്തു അലമാരയിൽ നിന്ന് രണ്ട് ലാപ്ടോപ്പുകൾ കവർന്നത്.​ ഫറോക്ക് ഇൻസ്പെക്ടർ ടി.എസ്.ശ്രീജിത്ത്, എസ്.ഐ എസ്.അനൂപ് എന്നിവരുടെ നേതൃത്വത്തിൽ നടത്തിയ അന്വേഷണത്തിൽ പ്രായപൂർത്തിയാകാത്ത കുട്ടികളാണ് മോഷണം നടത്തിയതെന്ന് വ്യക്തമായിരുന്നു.​ ഇവരെ ചോദ്യം ചെയ്തപ്പോൾ മോഷണം നടത്തി കൊണ്ടുവന്നാൽ പ്രതിഫലം നൽകാമെന്നു പ്രതി വാഗ്ദാനം നൽകിയെന്നും ഇതാണു കുട്ടികളെ മോഷണത്തിനു പ്രേരിപ്പിച്ചതെന്നും ബോദ്ധ്യപ്പെട്ടു. ഇവർ നൽകിയ സൂചന പ്രകാരമാണ് പ്രതിയെ പിടികൂടിയത്.​ ഫറോക്ക് അസി. കമ്മിഷണർ എ.എം.സിദ്ദിഖിന്റെ കീഴിലെ സ്പെഷൽ സ്ക്വാഡ് അംഗങ്ങളായ എ​.എസ്.ഐ​ പി.അരുൺ കുമാർ, സീനിയർ സി.പി.ഒ പി.മധുസൂദനൻ, സി.പി.ഒമാരായ പി.എം.സനീഷ്, അനൂജ് വളയനാട്, ഫറോക്ക് സ്റ്റേഷനിലെ സി.പി.ഒമാരായ കെ.പി.മുഹമ്മദ് അഷറഫ്, എം.പ്രജിത്ത്, എസ്.ദിവ്യേഷ്, പി.യശ്വന്ത് എന്നിവരാണ് അന്വേഷണ സംഘത്തിലുണ്ടായിരുന്നത്.