സുൽത്താൻ ബത്തേരി: മുത്തങ്ങയിൽ എം.ഡി.എം.എയുമായി യുവാവ് പൊലിസ് പിടിയിൽ. മലപ്പുറം സ്വദേശി മഞ്ചേരി, കരിവാരട്ടത്ത് വീട്ടിൽ, കെ.വി മുഹമ്മദ് റുഫൈൻ (30) ആണ് പിടിയിലായത്. വിൽപ്പനക്കായി കടത്തുകയായിരുന്ന 68.92 ഗ്രാം എം.ഡി.എം.എ ഇയാളിൽ നിന്ന് പിടികൂടി. ജില്ലാ ലഹരിവിരുദ്ധ സ്‌ക്വാഡും സുൽത്താൻ ബത്തേരി പൊലീസും ചേർന്നാണ് ഇയാളെ പിടികൂടിയത്. മുത്തങ്ങ പൊലീസ് ചെക്ക് പോസ്റ്റിന് സമീപം നടത്തിയ പരിശോധനയ്ക്കിടെയാണ് ഇയാൾ വലയിലായത്. പൊൻകുഴി ഭാഗത്തു നിന്നും മുത്തങ്ങ ഭാഗത്തേക്ക് നടന്നു വരുകയായിരുന്ന മുഹമ്മദ് റുഫൈനെ കണ്ട് സംശയം തോന്നി നടത്തിയ പരിശോധനയിലാണ് എം.ഡി.എം. എ പിടികൂടിയത്. ഇയാളുടെ പാന്റിന്റെ പോക്കറ്റിൽ നിന്നാണ് മയക്കുമരുന്ന് കണ്ടെടുത്തത്. അതിർത്തി വഴി സംസ്ഥാനത്തേക്കുള്ള ലഹരിക്കടത്ത് തടയുന്നതിനായി കർശന പരിശോധന തുടരുമെന്നും ലഹരി ഉപയോഗവും വിൽപ്പനയും തടയുന്നതിന് ശക്തമായ നിയമനടപടികൾ സ്വീകരിക്കുമെന്നും ജില്ലാ പൊലീസ് മേധാവി തപോഷ് ബസുമതാരി അറിയിച്ചു. എസ്.ഐ പി.എൻ. മുരളീധരൻ, എസ്.സി.പി.ഒ ഷൈജു, സി.പി.ഒ സജീവൻ എന്നിവരാണ് പരിശോധന സംഘത്തിലുണ്ടായിരുന്നത്.

മുഹമ്മദ് റുഫൈൻ