കോട്ടയം: പദ്ധതി നിർവഹണ പ്രവർത്തനങ്ങൾക്ക് നേതൃത്വം നൽകേണ്ട എ.ഇ, ഓവർസിയർ ഉദ്യോഗസ്ഥരുടെ സേവനം ഇല്ലാതായതോടെ പനച്ചിക്കാട് ഗ്രാമപഞ്ചായത്തിന്റെ പ്രവർത്തനം അവതാളത്തിൽ. എ.ഇ, ഓവർസിയർ ഉദ്യോഗസ്ഥരെ മറ്റ് ജില്ലകളിലേക്ക് സ്ഥലം മാറ്റിയിട്ട് ഒന്നരമാസമായി . തുടർ നിയമനം ഇതുവരെ നടത്തിയിട്ടില്ല. ഇതു മൂലം 23 വാർഡുകളിലെ വിവിധ വികസന പ്രവർത്തനങ്ങളെയാണ് ബാധിച്ചിരിക്കുന്നത്. മന്ത്രി മുതൽ വിവിധ തലങ്ങളിൽ പരാതി നൽകിയിട്ടും ഉദ്യോഗസ്ഥ നിയമനം നടത്തുന്നതിൽ കാലതാമസം നേരിടുന്ന സ്ഥിതിയാണ്.

കോൺഗ്രസ് പ്രതിഷേധിച്ചു

എ.ഇ, ഓവർസിയർ തസ്തികകളിൽ നിയമനം നടത്തണമെന്ന് ആവശ്യപ്പെട്ട് കോൺഗ്രസിന്റെ നേതൃത്വത്തിൽ പ്രതിഷേധ ധർണ സംഘടിപ്പിച്ചു. കളക്ടറേറ്റിനു മുമ്പിൽ തിരുവഞ്ചൂർ രാധാകൃഷ്ണൻ എം.എൽ.എ ഉദ്ഘാടനം നിർവഹിച്ചു. കോൺഗ്രസ് ഭരിക്കുന്ന പഞ്ചായത്തുകളോടുള്ള സംസ്ഥാന സർക്കാറിന്റെ അവഗണനയാണ് ഉദ്യോഗസ്ഥ നിയമനത്തിൽ അടക്കം നടക്കുന്ന അനാസ്ഥയാണെന്ന് ആരോപിച്ചു. പഞ്ചായത്ത് വൈസ് പ്രസിഡന്റ് റോയി മാത്യു അദ്ധ്യക്ഷത വഹിച്ചു. പഞ്ചായത്ത് പ്രസിഡന്റ് ആനി മാമൻ, കോൺഗ്രസ് ബ്ലോക്ക് പ്രസിഡന്റ് സിബി ജോൺ കൈതയിൽ, ജില്ലാ പഞ്ചായത്ത് അംഗം പി.കെ വൈശാഖ്, പാർലമെന്ററി പാർട്ടി ലീഡർ എബിസൺ കെ.എബ്രഹാം, മണ്ഡലം പ്രസിഡന്റ് ഇട്ടി അലക്‌സ് തുടങ്ങിയവർ പങ്കെടുത്തു.