പാലാ: നഗരത്തിലെ ഫുട്പാത്ത് കൈയ്യേറ്റത്തിൽ ഒറ്റയാൾ സമരവുമായി ജോയി കളരിക്കൽ. സിവിൽ സ്റ്റേഷന് മുന്നിൽ ഓട്ടോ സ്റ്റാന്റിന് എതിർവശം ഫുട്പാത്തിലെ ഓടയ്ക്ക് മുകളിൽ സ്ഥാപിച്ച കോൺക്രീറ്റ് തിട്ട നീക്കണമെന്നും ഇതോടു ചേർന്ന് ഫുട്പാത്തിലുള്ള പരസ്യബോർഡ് നീക്കണമെന്നും ആവശ്യപ്പെട്ടുകൊണ്ടാണ് പാലാ പൗരാവകാശ സമിതി പ്രസിഡന്റ് ജോയി കളരിക്കൽ ഇന്നലെ ഒറ്റയാൾ സമരം നടത്തിയത്. പാലാ മുനിസിപ്പൽ ഓഫീസിന് മുന്നിൽ നിന്നും സമരപ്രഖ്യാപന പ്ലക്കാർഡുമേന്തി നഗരത്തിലൂടെ നടന്ന് കൈയ്യേറ്റസ്ഥലത്തേക്ക് എത്തിയാണ് ജോയി സമരം ആരംഭിച്ചത്. നഗരസഭാ കൗൺസിലർ സിജി ടോണി സമരം ഉദ്ഘാടനം ചെയ്തു. ആന്റണി എള്ളുംകാലായിൽ, സന്തോഷ് പുളിക്കൽ തുടങ്ങിയവർ സമരത്തിന് പിന്തുണ പ്രഖ്യാപിച്ചു. നഗരസഭാ അധികാരികൾ അനധികൃത കൈയ്യേറ്റം എത്രയും വേഗം ഒഴിവാക്കുമെന്ന് പറഞ്ഞതിനെ സ്വാഗതം ചെയ്യുന്നുവെന്നും ഇതിന് മാറ്റമുണ്ടായാൽ നിരാഹാര സമരം ഉൾപ്പെടെയുള്ളവ ആരംഭിക്കുമെന്നും ജോയി കളരിക്കൽ മുന്നറിയിപ്പ് നൽകി.