കൊല്ലം: യുവതിയെ വെട്ടി കൊലപ്പെടുത്തിയ ശേഷം യുവാവ് ആത്മഹത്യ ചെയ്തു. എസ്എൻപുരം സ്വദേശി ശാരുവാണ് കൊല്ലപ്പെട്ടത്. യുവതിയെ വെട്ടിയ പ്രതി ലാലുമോനെ പിന്നീട് തൂങ്ങിമരിച്ച നിലയിൽ കണ്ടെത്തി. കൊല്ലം പുത്തൂർ വല്ലഭൻകരയിലെ ലാലുമോന്റെ വീട്ടിലാണ് മൃതദേഹങ്ങൾ കണ്ടെത്തിയത്.

ഇരുവരും ഏറെ കാലമായി അടുപ്പത്തിലായിരുന്നുവെന്നാണ് വിവരം. രണ്ട് വർഷം മുൻപ് റബ്ബർ തോട്ടത്തിൽ ശാരുവിനെ കെട്ടിയിട്ടെന്ന കേസിൽ അറസ്റ്റിലായ ലാലുമോൻ റിമാൻഡിൽ കഴിഞ്ഞിരുന്നു. ശാരുവിനെ വീട്ടിൽ വിളിച്ചു വരുത്തി ലാലുമോൻ കൊലപ്പെടുത്തിയെന്നാണ് നാട്ടുകാർ പറയുന്നത്. ശാരുവിന്റെ തലയിലും കെെയിലും വേട്ടേറ്റിരുന്നു.സംഭവത്തിൽ പുത്തൂർ പൊലീസ് അന്വേഷണം ആരംഭിച്ചു.