ലാഹോര്‍/ ന്യൂഡല്‍ഹി: അടുത്ത വര്‍ഷം ഫെബ്രുവരി - മാര്‍ച്ച് മാസങ്ങളിലാണ് പാകിസ്ഥാന്‍ വേദിയാകുന്ന ഐസിസി ചാമ്പ്യന്‍സ് ട്രോഫി മത്സരങ്ങള്‍ നടക്കുന്നത്. ടൂര്‍ണമെന്റിലെ ഇന്ത്യന്‍ ടീമിന്റെ പങ്കാളിത്തം സംബന്ധിച്ച് അനിശ്ചിതത്വം തുടരുകയാണ്. അടുത്തിടെ ഇന്ത്യന്‍ വിദേശകാര്യ മന്ത്രി എസ് ജയശങ്കര്‍ പാകിസ്ഥാന്‍ സന്ദര്‍ശിച്ചതോടെ ടൂര്‍ണമെന്റിനായി ഇന്ത്യ പാകിസ്ഥാനിലേക്ക് പോകുന്നത് സംബന്ധിച്ച അഭ്യൂഹങ്ങളും ഉയരുന്നുണ്ട്. കേന്ദ്ര സര്‍ക്കാരാണ് ഇന്ത്യന്‍ ടീമിനെ അയക്കണോ വേണ്ടയോ എന്ന കാര്യത്തില്‍ തീരുമാനമെടുക്കുന്നത്. എന്നാല്‍ തീവ്രവാദം അവസാനിപ്പിച്ചിട്ടാകാം ക്രിക്കറ്റ് എന്നാണ് കേന്ദ്രത്തിന്റെ നിലപാട്.
പാകിസ്ഥാനില്‍ ഷാങ്ഹായ് കോര്‍പ്പറേഷന്‍ ഓര്‍ഗനൈസേഷന്‍ ഉച്ചകോടിക്കായി ജയശങ്കര്‍ പങ്കെടുത്തിരുന്നു. ഈ സന്ദര്‍ശന വേളയില്‍ ചാമ്പ്യന്‍സ് ട്രോഫിയിലെ ഇന്ത്യയുടെ പങ്കാളിത്തവുമായി ബന്ധപ്പെട്ട ചര്‍ച്ചകളും അനൗദ്യോഗികമായി നടന്നുവെന്നാണ് ക്രിക്കറ്റ് വെബ്‌സൈറ്റായ ക്രിക്ബസ് റിപ്പോര്‍ട്ട് ചെയ്യുന്നത്. പാകിസ്ഥാന്‍ വിദേശകാര്യമന്ത്രി ഇഷാഖ് ദാറുമായുള്ള ചര്‍ച്ചകള്‍ക്കിടെ രോഹിത് ശര്‍മ്മയുടെ നേതൃത്വത്തിലുള്ള ഇന്ത്യന്‍ ടീമിന്റെ പാക് സന്ദര്‍ശനവും ഉയര്‍ന്നുവന്നു.
ഇരു വിദേശകാര്യമന്ത്രിമാരും സംസാരിക്കുന്നതിനിടെ പിസിബി തലവന്‍ മൊഹ്‌സിന്‍ നഖ്‌വിയും എസ് ജയശങ്കറുമായി സംസാരിച്ചിരുന്നുവെന്നാണ് റിപ്പോര്‍ട്ടുകള്‍. പിസിബി തലവനായ നഖ്‌വി പാക് സര്‍ക്കാരിലെ ഒരു മന്ത്രി കൂടിയാണ്. ഇതിന്റെ അടിസ്ഥാനത്തിലാണ് അദ്ദേഹം ജയശങ്കറുമായി സംസാരിച്ചത്. ഐസിസി തലപ്പത്ത് ജയ് ഷാ കൂടി എത്തിയതോടെ ഇന്ത്യ ചാമ്പ്യന്‍സ് ട്രോഫി കളിക്കാന്‍ പാകിസ്ഥാനിലേക്ക് എത്തുമെന്ന പ്രതീക്ഷയിലാണ് പിസിബി.
കറാച്ചി, റാവല്‍പിണ്ടി, ലാഹോര്‍ എന്നിവിടങ്ങളാണ് ചാമ്പ്യന്‍സ് ട്രോഫിയുടെ വേദികള്‍. ഇതില്‍ ഇന്ത്യയുടെ ഗ്രൂപ്പ് ഘട്ടത്തിലെ മൂന്ന് മത്സരങ്ങളും ലാഹോറിലെ ഗദ്ദാഫി സ്റ്റേഡിയത്തിലാണ് നടത്താന്‍ ആലോചിക്കുന്നത്. ഫെബ്രുവരി 20ന് ബംഗ്ലാദേശ്, 23ന് പാകിസ്ഥാന്‍, മാര്‍ച്ച് രണ്ടിന് ന്യൂസിലാന്‍ഡ് എന്നിവരാണ് ഇന്ത്യയുടെ എതിരാളികള്‍. ടൂര്‍ണമെന്റിന് വേണ്ടി വന്‍ തുക ചിലവഴിച്ച് കറാച്ചിയിലെ നാഷണല്‍ സ്റ്റേഡിയവും ലാഹോര്‍ സ്റ്റേഡിയവും പിസിബി പുതുക്കി പണിയുകയാണ്.
ഇന്ത്യയുമായി വളരെ അടുത്ത് സ്ഥിതി ചെയ്യുന്ന സ്ഥലം എന്ന നിലയിലാണ് ഇന്ത്യയുടെ മത്സരങ്ങളും ഇന്ത്യ യോഗ്യ നേടിയാല്‍ കളിക്കേണ്ട സെമി ഫൈനല്‍ മത്സരവും ഒപ്പം ഫൈനലും ലാഹോറില്‍ ക്രമീകരിച്ചിരിക്കുന്നത്. എന്നാല്‍ ഇന്ത്യയുടെ മത്സരങ്ങള്‍, യോഗ്യത നേടിയാല്‍ സെമിയും ഫൈനലും ഉള്‍പ്പെടെയുള്ളവ ദുബായിലേക്ക് മാറ്റണമെന്നാണ് ഇന്ത്യയുടെ ആവശ്യം എന്ന തരത്തില്‍ സ്ഥിരീകരിക്കാത്ത ചില റിപ്പോര്‍ട്ടുകള്‍ പുറത്ത് വന്നിരുന്നു.
പാകിസ്ഥാന്‍ മുന്നോട്ടുവച്ചിരിക്കുന്ന പുതിയ ഫോര്‍മുല അനുസരിച്ച് മത്സര ദിവസങ്ങളില്‍ മാത്രം ലാഹോറിലേക്ക് എത്തി മത്സരം കഴിഞ്ഞ് ഇന്ത്യന്‍ താരങ്ങള്‍ക്ക് നാട്ടിലേക്ക് മടങ്ങുന്നതിനുള്ള സംവിധാനം ഒരുക്കാന്‍ പിസിബി തയ്യാറാണ്. മൊഹാലിയില്‍ നിന്ന് വളരെ അടുത്താണ് ലാഹോര്‍. അതുകൊണ്ട് തന്നെ ഇന്ത്യയുടെ പരിശീലനവും ക്യാമ്പും മത്സരങ്ങള്‍ക്കിടയിലെ ഇടവേള ദിനങ്ങളില്‍ മൊഹാലിയില്‍ സംഘടിപ്പിക്കുകയും ചെയ്യാം. മാത്രമല്ല ലൊജിസ്റ്റിക്‌സ് കാരണങ്ങള്‍ക്കും മൊഹാലി കുറച്ചുകൂടി എളുപ്പമാണ് ലാഹോറില്‍ നിന്ന്.
മൊഹാലിയില്‍ ക്യാമ്പ് ചെയ്ത ശേഷം മത്സര ദിവസങ്ങളില്‍ മാത്രം പാകിസ്ഥാനിലേക്ക് വരികയാണെങ്കില്‍ ഇന്ത്യക്ക് പാകിസ്ഥാനിലെ ഹോട്ടലുകളില്‍ താമസിക്കേണ്ട ആവശ്യം വരില്ലെന്നും പിസിബി മുന്നോട്ടുവച്ച ഫോര്‍മുലയില്‍ പറയുന്നു. ഗ്രൂപ്പിലെ രണ്ടാം മത്സരത്തിന് ശേഷം ഒരാഴ്ചത്തെ ഇടവേളയുണ്ട് ഇന്ത്യക്ക് അടുത്ത മത്സരത്തിന് ഈ സമയത്ത് ഉള്‍പ്പെടെ നാട്ടിലേക്ക് മടങ്ങി അവിടെ പരിശീലനം നടത്താനും കഴിയുമെന്നാണ് പിസിബി മുന്നോട്ടുവയ്ക്കുന്ന രീതിയില്‍ പറയുന്നത്.
എന്നാല്‍ കഴിഞ്ഞ വര്‍ഷം പാകിസ്ഥാന്‍ വേദിയായ ഏഷ്യ കപ്പില്‍ ഇന്ത്യയുടെ ഫൈനല്‍ ഉള്‍പ്പെടെയുള്ള മത്സരങ്ങള്‍ ഹൈബ്രിഡ് മോഡലില്‍ ശ്രീലങ്കയിലാണ് നടത്തിയത്. ആതിഥേയരായ പാകിസ്ഥാന്‍ പോലും ഇന്ത്യയെ നേരിടാന്‍ ശ്രീലങ്കയിലേക്ക് യാത്ര ചെയ്തിരുന്നു. എന്നാല്‍ തൊട്ടുപിന്നാലെ നടന്ന ലോകകപ്പ് മത്സരങ്ങള്‍ക്കായി പാകിസ്ഥാന്‍ ക്രിക്കറ്റ് ടീം ഇന്ത്യയിലേക്ക് വന്നിരുന്നു. ഇന്ത്യയില്‍ തങ്ങള്‍ക്ക് ഒരുക്കിയ സൗകര്യങ്ങളിലും ആരാധകരുടെ പിന്തുണയിലും ബാബറും സംഘവും വലിയ തൃപ്തി രേഖപ്പെടുത്തുകയും ചെയ്തിരുന്നു.