ഏത് പ്രായക്കാരെയും അലട്ടുന്ന പ്രശ്‌നമാണ് നര. ഇതിന് പരിഹാരമായി ഭൂരിഭാഗം പേരും കെമിക്കൽ ഡൈ ആണ് ഉപയോഗിക്കാറുള്ളത്. എന്നാൽ, ദീർഘനാളത്തെ കെമിക്കൽ ഡൈ ഉപയോഗം കാരണം നിങ്ങളുടെ മുടിക്ക് ബലം കുറയുകയും പെട്ടെന്ന് പൊട്ടിപ്പോവുകയും ചെയ്യുന്നു. മാത്രമല്ല, ചിലരിൽ അലർജി പോലുള്ള പ്രശ്നങ്ങളും ഉണ്ടാകുന്നു. അതിനാൽ, വളരെ എളുപ്പത്തിൽ തയ്യാറാക്കാൻ കഴിയുന്ന ഒരു നാച്വറൽ ഡൈയെക്കുറിച്ച് അറിയാം. ഈ ഡൈക്ക് ആവശ്യമായ സാധനങ്ങൾ എന്തൊക്കെയാണെന്നും തയ്യാറാക്കേണ്ട വിധവും നോക്കാം.

ആവശ്യമായ സാധനങ്ങൾ

വെള്ളം - 2 ഗ്ലാസ്

തേയിലപ്പൊടി - 2 ടേബിൾസ്‌പൂൺ

നെല്ലിക്ക - 4 എണ്ണം

ഇഞ്ചി - 1 ചെറിയ കഷ്‌ണം

കറിവേപ്പില - ഒരു പിടി

കരിംജീകരം - 1 ടേബിൾസ്‌പൂൺ

ഹെന്നപ്പൊടി - 1 ടേബിൾസ്‌പൂൺ

നെല്ലിക്കപ്പൊടി - 1 ടേബിൾസ്‌പൂൺ

കയ്യോന്നിപ്പൊടി - 1 ടേബിൾസ്‌പൂൺ

തയ്യാറാക്കുന്ന വിധം

തേയില വെള്ളം തിളപ്പിച്ച് മാറ്റി വയ്‌ക്കുക. ശേഷം നെല്ലിക്ക, ഇഞ്ചി, കറിവേപ്പില എന്നിവ ചതച്ച് ഒരു ഇരുമ്പ് ചീനച്ചട്ടിയിലേക്ക് മാറ്റി ലോ ഫ്ലെയിമിൽ വറുത്തെടുക്കണം. ജലാംശം എല്ലാം മാറി നല്ല രീതിയിൽ ചൂടാവുമ്പോൾ അതിലേക്ക് കരിംജീരകം ചേർത്ത് പത്ത് മിനിട്ട് കൂടി ചൂടാക്കിയെടുക്കുക. അൽപ്പസമയം തണുക്കാൻ വച്ചശേഷം തരിയില്ലാതെ പൊടിച്ചെടുക്കുക. ഈ പൊടി ഒരു ബോട്ടിലിൽ അടച്ച് സൂക്ഷിച്ച് ആവശ്യമുള്ളപ്പോൾ ഉപയോഗിക്കാവുന്നതാണ്.

ഒരു ഇരുമ്പ് പാത്രത്തിൽ, ഇപ്പോൾ തയ്യാറാക്കിയ പൊടിയും ഹെന്നപ്പൊടി, നെല്ലിക്കപ്പൊടി, കയ്യോന്നിപ്പൊടി എന്നിവ തേയിലവെള്ളം ചേർത്ത് യോജിപ്പിച്ച് ഒരു ദിവസം മുഴുവൻ അടച്ച് വയ്‌ക്കുക. പിറ്റേന്ന് മുടിയിൽ പുരട്ടാവുന്നതാണ്. എണ്ണമയമുള്ള മുടിയിൽ ഒരിക്കലും നാച്വറൽ ഡൈ പുരട്ടാൻ പാടില്ല. എങ്കിൽ ഫലം ലഭിക്കുന്നതല്ല. ഡൈ പുരട്ടി ഒരു മണിക്കൂറെങ്കിലും വച്ചശേഷം കഴുകി കളയാവുന്നതാണ്.