വാഷിംഗ്ടൺ: യു.എസ് പ്രസിഡൻഷ്യൽ തിരഞ്ഞെടുപ്പ് പ്രവചനങ്ങളിൽ റിപ്പബ്ലിക്കൻ സ്ഥാനാർത്ഥിയും മുൻ പ്രസിഡന്റുമായ ഡൊണാൾഡ് വീണ്ടും മുന്നിൽ. ട്രംപിന് 52 ശതമാനം ജയസാദ്ധ്യതയുണ്ടെന്ന് ഡിസിഷൻ ഡെസ്‌ക് എച്ച്.ക്യു-ദ ഹിൽ സർവേ പറയുന്നു.

ഡെമോക്രാറ്റിക് സ്ഥാനാർത്ഥി കമല ഹാരിസിന് 42 ശതമാനം സാദ്ധ്യതയാണുള്ളത്. മിഷിഗൺ,​ വിസ്കോൺസിൻ,​ അരിസോണ,​ ജോർജിയ,​ നോർത്ത് കാരലൈന സ്റ്റേറ്റുകളിൽ ട്രംപ് നില മെച്ചപ്പെടുത്തി. ഡെമോക്രാറ്റുകൾക്കും റിപ്പബ്ലിക്കൻമാർക്കും ഒരു പോലെ പിന്തുണയുള്ള ഏഴ് സ്റ്റേറ്റുകളിൽ (ബാറ്റിൽ ഗ്രൗണ്ട് സ്റ്റേറ്റ്) പെൻസിൽവേനിയയിൽ മാത്രമാണ് കമലയ്ക്ക് ലീഡെന്ന് സർവേ സൂചിപ്പിക്കുന്നു.

ആഗസ്റ്റ് അവസാനം മുതൽ കമലയ്ക്കായിരുന്നു സർവേയിൽ മുൻതൂക്കം. കമലയ്ക്ക് 54 - 56 ശതമാനം സാദ്ധ്യത പ്രവചിച്ചപ്പോൾ 44 - 46 ശതമാനത്തിലേക്ക് ട്രംപിന്റെ സാദ്ധ്യത താണിരുന്നു. എന്നാൽ,​ ഈ മാസം തുടക്കം മുതൽ ഇരുവരും ഇഞ്ചോടിഞ്ച് പോരാട്ടത്തിലാണ്. നവംബർ 5നാണ് തിരഞ്ഞെടുപ്പ്.