ചില വസ്തുക്കളുടെ അത്ഭുത ഗുണങ്ങൾ നമ്മൾ തിരിച്ചറിയപ്പെടാതെ പോകാറുണ്ട്. അത്തരത്തിലൊരു സാധനമാണ് ചെറുനാരങ്ങയുടെ തൊലി. ജ്യൂസുണ്ടാക്കാൻ ഉൾപ്പടെ നിരവധി കാര്യങ്ങൾക്ക് ചെറുനാരങ്ങ ഉപയോഗിക്കാറുണ്ട്. എന്നാൽ മിക്കവരും ഇതിന്റെ തൊലി വലിച്ചെറിയുകയാണ് ചെയ്യാറ്.

യഥാർത്ഥത്തിൽ അത്ഭുതകരമായ പല ഗുണങ്ങളും ചെറുനാരങ്ങയുടെ തൊലിക്കുണ്ട്. ചെറുനാരങ്ങയുടെ തൊലിയിൽ വൈറ്റമിൻ സി അടങ്ങിയിട്ടുണ്ട്. നന്നായി കഴുകിയ ശേഷം ഇത് ചെറിയ കഷ്ണങ്ങളാക്കി മുറിച്ച്, ചായയിൽ കുറച്ച് ചേർത്ത് കഴിക്കുന്നത് വളരെ നല്ലതാണ്. രോഗ പ്രതിരോധ ശേഷി വർദ്ധിപ്പിക്കാനും ഇത് സഹായകരമാണ്. അമിതഭാരം കുറക്കാനും ചെറുനാരങ്ങയുടെ തൊലി സഹായിക്കുമെന്ന് പറയപ്പെടുന്നു.

നാരങ്ങയുടെ തൊലി നന്നായി കഴുകി വൃത്തിയാക്കുക. ശേഷം ഉണക്കിയെടുക്കുക. ഇനി പൊടിച്ച് ഒരു കുപ്പിയിൽ സൂക്ഷിച്ചുവയ്ക്കാം. ഇത് കുറച്ച് കേക്കിലൊക്കെ ചേർത്താൽ നല്ലതാണ്. ചെറുനാരങ്ങയുടെ തൊലി സാലഡുകളിലും സൂപ്പുകളിലുമൊക്കെ ചേർക്കാറുണ്ട്.

അതുപോലെത്തന്നെ മീനോ ചിക്കനോ വെളുത്തുള്ളിയോ സവാളയോ ഒക്കെ ക്ലീനാക്കിയ ശേഷം കൈയിലെ ഗന്ധം കളയാൻ കുറച്ച് പാടാണ്. എത്ര സോപ്പിട്ട് കഴുകിയാലും അത്‌ പൂർണമായും പോകണമെന്നില്ല. ഇത് മിക്കവരും നേരിടുന്ന ഒരു പ്രശ്നമാണ്. അതിനുള്ള പരിഹാരവും ചെറുനാരങ്ങയുടെ തൊലിയിലുണ്ട്. നാരങ്ങ പിഴിഞ്ഞ ശേഷം ബാക്കിയുള്ള തൊണ്ട് കൊണ്ട് കൈയിൽ നന്നായി മസാജ് ചെയ്താൽ ഇതിനുപരിഹാരമാകും.