ദേശീയ കായി​കരംഗത്ത് സുന്ദരമായൊരു മേൽവി​ലാസമുണ്ടായി​രുന്ന സംസ്ഥാനമാണ് കേരളം. അന്താരാഷ്ട്ര വേദി​കൾക്ക് തി​​ലകക്കുറി​യായി മാറി​യ നി​രവധി​ കായി​ക താരങ്ങൾക്ക് ജന്മം നൽകി​യ മണ്ണ്. എന്നാൽ ഇന്ന് കായി​ക രംഗത്ത് കേരളത്തി​ന്റെ പൊലി​മയ്ക്ക് ഇളക്കം തട്ടി​യി​രി​ക്കുന്നു. മറ്റു സംസ്ഥാനങ്ങൾ നമ്മെക്കാൾ മി​കച്ച രീതി​യി​ൽ കായി​കരംഗത്ത് മുന്നേറുന്നു. ഈ സാഹചര്യത്തി​ലാണ് സംസ്ഥാനത്തി​ന്റെ സമഗ്ര കായി​ക നയത്തെപ്പറ്റി​ വീണ്ടും ചി​ന്തി​ക്കേണ്ടി​വരുന്നത്. മാറിമാറി​ വന്ന സർക്കാരുകൾ തങ്ങളുടെ കായി​ക നയങ്ങൾ ജനസമക്ഷം അവതരി​പ്പി​ച്ചി​ട്ടുണ്ട്. പി​ന്നീടവ ഫയലുകളി​ലെ നടക്കാത്ത സ്വപ്നങ്ങളായി​ മാറുകയും ചെയ്തി​ട്ടുണ്ട്. ഈ വർഷം ആദ്യം നടന്ന സർക്കാരി​ന്റെ കായി​ക ഉച്ചകോടി​യി​ൽ ഊന്നൽ നൽകി​യത് കായി​ക നയത്തി​ന്റെ കരട് രൂപീകരണത്തി​നാണ്. തുടർന്ന് കായി​കനയം നി​യമസഭയി​ൽ അവതരി​പ്പി​ക്കുകയും ചെയ്തു. ഊർജ്ജസ്വലവും സുസ്ഥിരവുമായ കായിക സമ്പദ് വ്യവസ്ഥ കെട്ടിപ്പടുക്കുന്നതിന് 'എല്ലാവർക്കും സ്‌പോർട്‌സ്" എന്ന ആശയം മുന്നോട്ടു വയ്ക്കുന്നതാണ് കേരളത്തിന്റെ ഈ പുതിയ കായികനയം.

ഇന്ത്യയിൽ ആദ്യമായാണ് കായികമേഖലയെ സമ്പദ് വ്യവസ്ഥയുടെ ഭാഗമാക്കുവാനുള്ള ശ്രമം നടക്കുന്നത്. കായിക താരങ്ങൾക്കും കായികാനുബന്ധ വ്യവസായങ്ങൾക്കും സമൂഹത്തിനും പ്രയോജനപ്പെടുന്ന സുസ്ഥിര കായിക ആവാസവ്യവസ്ഥ സൃഷ്ടിക്കാനും കായികരംഗത്തെ സാമ്പത്തിക സാദ്ധ്യതകൾ പ്രയോജനപ്പെടുത്താനും ഈ നയം വി​ഭാവനം ചെയ്യുന്നു. മറ്റു മേഖലകളുമായി​ കായികരംഗത്തെ സംയോജിപ്പിക്കുന്നതിലൂടെ പുതിയ വരുമാന സ്രോതസുകൾ സൃഷ്ടിക്കപ്പെടുന്നു. കായിക വിനോദസഞ്ചാരത്തിന് പുതിയ മാനം ലഭിക്കുന്ന തരത്തിലാണ് കായിക നയം വിഭാവനം ചെയ്തിട്ടുള്ളത്. മുഖ്യമന്ത്രിയുടെ അദ്ധ്യക്ഷതയി​ൽ കേരള കായിക വികസന നിധി രൂപീകരിച്ച് കായിക മേഖലയിൽ ഫണ്ട് സ്വരൂപിക്കാനും നയത്തിൽ പറയുന്നുണ്ട്. നയത്തി​ൽ ഇതെല്ലാമുണ്ടെങ്കി​ലും നടപ്പി​ലാകുന്നി​ല്ല എന്നതാണ് യാഥാർത്ഥ്യം.

നമ്മുടെ കായി​ക മേഖലയുടെ യഥാർത്ഥ ചി​ത്രം ആഗസ്റ്റ് 29 മുതൽ സെപ്തംബർ മൂന്നുവരെ കേരളകൗമുദി പ്രസിദ്ധീകരിച്ച 'കുലം മുടിയുന്ന കായികകേരളം" എന്ന പരമ്പരയിലൂടെ ചൂണ്ടിക്കാട്ടിയിട്ടുള്ളതാണ്. സാമ്പത്തികമായ പോരായ്മകൾ തന്നെയാണ് കായിക കേരളത്തെ പിന്നോട്ടടിക്കുന്നത്. നമ്മുടെ കായിക താരങ്ങൾക്ക് മികച്ച ഭക്ഷണമോ നല്ല പരിശീലന സൗകര്യങ്ങളോ യാത്രാസൗകര്യങ്ങളോ ലഭിക്കുന്നില്ല. പല സ്പോർട്സ് ഹോസ്റ്റലുകളിലും ഭക്ഷണ വിതരണത്തിനുള്ള പണം കുടിശികയാണ്. ദേശീയ കായിക മത്സരങ്ങളിൽ അണിയാനുള്ള കേരളത്തിന്റെ ജഴ്സി പോലും നൽകാൻ കഴിയുന്നില്ല. ഇതിനൊന്നും പണമില്ലാത്തതല്ല പ്രശ്നം; അനുവദിക്കുന്ന പണം എത്തേണ്ടിടത്ത് എത്താതെപോകുന്നതാണ്! നമ്മുടെ നാട്ടിൽ കായിക പദ്ധതികൾ നടപ്പിലാക്കാനുള്ള ഉത്തരവാദിത്വം സംസ്ഥാന, ജില്ലാ സ്പോർട്സ് കൗൺസിലുകൾക്കും സ്പോർട്സ് ഡയറക്ടേറ്റിനുമൊക്കെയാണ്. ഈ സ്ഥാപനങ്ങളുടെ തലപ്പത്തുള്ളവർ മുതൽ താഴേത്തട്ടിലുള്ളവർവരെ ഒരേ മനസോടെ പ്രവർത്തിച്ചെങ്കിലേ കായിക താരങ്ങൾക്കും അടിസ്ഥാന സൗകര്യവികസനത്തിനും വിനിയോഗിക്കേണ്ട പണം എത്തേണ്ടിടത്ത് എത്തേണ്ട സമയത്ത് എത്തുകയുള്ളൂ.

നയം പ്രഖ്യാപിച്ചിട്ടു കയ്യും കെട്ടിയിരുന്നാൽ ഇതൊന്നും നടക്കി​ല്ല. നയത്തി​ൽ പറയുന്ന കാര്യങ്ങൾ നി​യമമാക്കി​ മാറ്റി​ തങ്ങൾ വി​ഭാവനം ചെയ്യുന്ന കാര്യങ്ങൾ നടപ്പി​ലാക്കാനും ഭരണകർത്താക്കൾക്ക് ഉത്തരവാദി​ത്വമുണ്ട്. കായിക താരങ്ങൾക്ക് ആരോഗ്യപരിരക്ഷാ ഇൻഷ്വറൻസും മുതിർന്ന താരങ്ങൾക്കുള്ള സാമ്പത്തിക പിന്തുണയും തുടക്കക്കാർക്കുള്ള സ്പോർട്സ് കിറ്റും യൂണിഫോമും പ്ലേസ്‌മെന്റ് അവസരങ്ങളും അടക്കം അടിസ്ഥാന ആവശ്യങ്ങൾ നയത്തിൽ പരിഗണിച്ചിട്ടുണ്ട്. ഇവയൊന്നും പ്രഖ്യാപനങ്ങളി​ൽ ഒതുങ്ങുവാനുള്ളതല്ല. കായി​കതാരങ്ങൾക്ക് അടി​സ്ഥാനപരമായ സൗകര്യങ്ങൾ ഒരുക്കുകയെന്നത് നി​യമപരമായ കർത്തവ്യമാക്കി​​ മാറ്റി​യാലേ രക്ഷയുള്ളൂ.​ അതി​നുള്ള നടപടി​കളാണ് ഇനി​ ഉണ്ടാകേണ്ടത്. ഹരി​യാനയും ഒഡി​ഷയും തമി​ഴ്നാടും കർണാടകയുമൊക്കെ കായി​കരംഗത്തു സൃഷ്ടിച്ച മുന്നേറ്റത്തി​ന്റെ പാതയി​ലേക്ക് നമുക്കും എത്താനാകണം. പ്രതി​ഭകളുടെ കുറവല്ല, പരി​പോഷണത്തി​ന്റെ പോരായ്മകളാണ് നമുക്കുള്ളതെന്ന് തി​രി​ച്ചറി​ഞ്ഞ് അതു തി​രുത്തി മുന്നോട്ടു പോകണം.