പനാജി നവംബർ 20 മുതൽ 28 വരെ നടക്കുന്ന ഗോവ അന്താരാഷ്ട്ര ചലച്ചിത്ര മേളയിലെ ഇന്ത്യൻ പനോരമാ വിഭാഗത്തിൽ മലയാളത്തിൽ നിന്ന് നാലു ചിത്രങ്ങൾ ഇടം നേടി. ആടുജീവിതം,​ മഞ്ഞുമ്മൽ ബോയ്‌സ്,​ ഭ്രമയുഗം,​ ലെവൽക്രോസ് എന്നിവയാണ് മലയാളത്തിൽ നിന്ന് ഇന്ത്യൻ പനോരമയിലെ ഫീച്ച‍ർ വിഭാഗത്തിലേക്ക് തിരഞ്ഞെടുക്കപ്പെട്ടത്. രൺദീപ് ഹൂ‌ഡ സംവിധാനം ചെയ്ത് നായകവേഷത്തിലെത്തിയ സ്വതന്ത്ര വീർസവർക്കർ ആണ് ഇന്ത്യൻ പനോരമയിലെ ഉദ്ഘാടന ചിത്രം. 384 ചിത്രങ്ങളിൽ നിന്നാണ് ഫീച്ചർ വിഭാഗത്തിലെ 25 സിനിമകൾ തിരഞ്ഞെടുത്തത്. നോൺ ഫീച്ചർ വിഭാഗത്തിലെ ചിത്രങ്ങൾ തിരഞ്ഞെടുത്തത് 262 എണ്ണത്തിൽ നിന്നുമാണ്. ഘർ ജൈസാ കുഛ് ആണ് ഇന്ത്യൻ പനോരമയിലെ നോൺ ഫീച്ചർ വിഭാഗത്തിലെ ഉദ്ഘാടന ചിത്രം.

തമിഴിൽ നിന്ന് ജിഗർതണ്ട ഡബിൾ എക്സും തെലുങ്കിൽ നിന്ന് കൽക്കി 2898 എ .ഡി എന്നിവയും പ്രദർശിപ്പിക്കും. ഇതിൽ മുഖ്യധാരാ സിനിമാ വിഭാ​ഗത്തിലാണ് മഞ്ഞുമ്മൽ ബോയ്സും കൽക്കിയും ഉൾപ്പെട്ടിരിക്കുന്നത്. വിക്രാന്ത് മാസി നായകനായ 12ത്ത് ഫെയിൽ എന്ന ചിത്രവും ഈ പട്ടികയിലുണ്ട്. അതേസമയം നോൺ ഫീച്ചർ വിഭാ​ഗത്തിൽ മലയാളത്തിൽ നിന്നുള്ള ചിത്രങ്ങളില്ല. നടൻ മനോജ് ജോഷിയുടെ നേതൃത്വത്തിലുള്ള 12 അം​ഗങ്ങളാണ് ഇന്ത്യൻ പനോരമ ഫീച്ചർ ഫിലിം വിഭാ​ഗത്തിലെ സിനിമകൾ തിരഞ്ഞെടുത്തത്.ഓസ്ട്രേലിയയിൽനിന്നുള്ള ചിത്രങ്ങളാണ് കൺട്രി ഫോക്കസ് വിഭാ​ഗത്തിൽ പ്രദർശിപ്പിക്കുക. ഏഴ് ചിത്രങ്ങളായിരിക്കും ഈ വിഭാ​ഗത്തിൽ പ്രദർശിപ്പിക്കുക.