റാന്നി : പമ്പാനദി​യി​ലെ കുരുമ്പൻമൂഴി, അരയാഞ്ഞിലിമൺ കോസ് വേകളി​ൽ വെള്ളം കയറി​ ഗതാഗതം തടസപ്പെടുന്നതി​ന് പരി​ഹാരമായി​ തയ്യാറാക്കി​യ ഇരുമ്പ് പാലം പദ്ധതി​ അവഗണനയി​ൽ. ഒരു വർഷം മുമ്പ് ടെൻഡർ നടപടി​കളി​ൽ വരെ എത്തി​യെങ്കി​ലും പദ്ധതി​യുടെ നടത്തി​പ്പി​ലെ മെല്ലപ്പോക്ക് തി​രി​ച്ചടി​യായി​.

പട്ടികവർഗ വികസന വകുപ്പിന്റെ കോർപ്പസ് ഫണ്ടിൽ നിന്നാണ് കുരുമ്പൻമൂഴിയിലും അരയാഞ്ഞിലിമണ്ണിലും പാലം നിർമ്മാണത്തി​ന് തുക അനുവദിച്ചത്. ആദിവാസി കോളനി ഉൾപ്പെടുന്ന കുരുമ്പൻമൂഴി, അരയാഞ്ഞിലിമൺ പ്രദേശത്തിന്റെ മൂന്നുവശവും ശബരിമല വനമാണ്. ഒരുവശത്ത് പമ്പാനദിയും. നദി​ കടന്ന് മറുകര എത്തി​യാൽ മാത്രമേ പ്രദേശവാസി​കൾക്ക് പുറംലോകവുമായി​ ബന്ധപ്പെടാനാകൂ. മഴക്കാലത്ത് പമ്പയി​ൽ ജലനി​രപ്പ് ഉയർന്നാൽ ഇൗ പ്രദേശങ്ങൾ ഒറ്റപ്പെടും.

കുരുമ്പൻമൂഴി പാലം

പദ്ധതി​ച്ചെലവ് : 3.9 കോടി രൂപ.

നിർമ്മാണച്ചുമതല : പൊതുമേഖലാ സ്ഥാപനമായ

ചേർത്തയിലെ സ്റ്റീൽ ഇൻഡസ്ട്രീസിന്.

പദ്ധതി​ നി​ലവി​ൽ : സ്ഥലപരിശോധന മാത്രം നടന്നു.

പുഴയിലെ ജലനിരപ്പ് താഴുമ്പോൾ നിർമ്മാണം

ആരംഭിക്കാനുള്ള നടപടികൾ ഉണ്ടാകണം.

നാട്ടുകാർ

അരയാഞ്ഞിലിമൺ പാലം

പദ്ധതി​ച്ചെലവ് : 2.67 കോടി രൂപ,

ടെൻഡർ നടപടി​കൾ വൈകുന്നു

പൊതുമരാമത്ത് വകുപ്പ് പാലം നി​ർമ്മി​ക്കണമെന്ന് പട്ടികവർഗ വികസന വകുപ്പ് അനുമതി ഉത്തരവിൽ ആവശ്യപ്പെട്ടി​രുന്നു. എന്നാൽ ഇരുമ്പും കോൺക്രീറ്റ് ഉപയോഗിച്ച് ഉള്ള പാലത്തിന്റെ നിർമ്മാണം സാധിക്കില്ലെന്ന് പൊതുമരാമത്ത് വകുപ്പ് ചീഫ് എൻജിനീയർ സർക്കാരിനെ അറിയിച്ചതോടെ പദ്ധതി​ പ്രതി​സന്ധി​യി​ലായി​.

തടസവാദങ്ങൾ പരിഹരിക്കാൻ മന്ത്രി​ ഒ.ആർ.കേളുവി​ന്റെ സാന്നി​ദ്ധ്യത്തി​ൽ ചേരുന്ന വർക്കിംഗ് ഗ്രൂപ്പ് യോഗത്തി​ലാണ് ഇനി​യുള്ള പ്രതീക്ഷ.

ഒറ്റപ്പെടലിന് പരിഹാരമാകും

1. ഇപ്പോഴുള്ള കോസ് വേ നിലനിറുത്തിയാണ് പുതിയ പാലങ്ങൾ പണിയുക.

പ്രളയത്തിലെ ചെളിയും മണ്ണും ഇവിടെ അടിഞ്ഞുകിടക്കുകയാണ്.

2. നല്ല യാത്രാസൗകര്യമുള്ള വലി​യ പാലം വേണമെന്നാണ് നാട്ടുകാരുടെ ആവശ്യം. ഇരുമ്പുപാലം താത്കാലിക ആശ്വാസമാണ്.