പത്തനംതിട്ട : എ.ജി ഇന്ദിരാമണിയമ്മയ്ക്ക് അർഹമായ സ്മാരകം ഒരുക്കാൻ നഗരസഭാ കൗൺസിൽ ഐകകണ്ഠേന തീരുമാനിച്ചു. ജനപ്രതിനിധി എന്ന നിലയിൽ അവർ നടത്തിയ മാതൃകാപരമായ പ്രവർത്തനവും സമൂഹത്തിലെ വിവിധ തുറകളിൽപ്പെട്ട നൽകിയ കലർപ്പില്ലാത്ത സ്നേഹവും കൗൺസിൽ അംഗങ്ങൾ അനുസ്മരിച്ചു. 40 വർഷം അദ്ധ്യാപിക എന്ന നിലയിൽ സമർപ്പിത സേവനം നടത്തിയ അങ്കണവാടിയിലുൾപ്പെടെ വിവിധ ഇടങ്ങളിൽ ഇന്ദിരാമണിയമ്മയുടെ സ്മാരകം ഉയർത്തണമെന്ന് അംഗങ്ങൾ നിർദ്ദേശിച്ചു. നിയമപരമായ സാദ്ധ്യതകൾ പരിശോധിച്ച് മുന്നോട്ടു പോകാനും യോഗം തീരുമാനിച്ചു. നഗരസഭാ ചെയർമാന്റെ അദ്ധ്യക്ഷതയിൽ കൗൺസിൽ ഹാളിൽ അനുശോചന യോഗം ചേർന്നു. അഡ്വ.ടി സക്കീർ ഹുസൈൻ അനുശോചന പ്രമേയം അവതരിപ്പിച്ചു. ഡെപ്യൂട്ടി ചെയർപേഴ്സൺ ആമിന ഹൈദരാലി, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.ആർ അജിത് കുമാർ, ജെറി അലക്സ്, ഷമീർ എസ്, പ്രതിപക്ഷ നേതാവ് എ ജാസിംകുട്ടി തുടങ്ങി എല്ലാ കൗൺസിൽ അംഗങ്ങളും യോഗത്തിൽ സംസാരിച്ചു.