മല്ലപ്പള്ളി : മല്ലപ്പള്ളി ഗ്രാമപഞ്ചായത്തിലെ നാരകത്താനി 67-ാം നമ്പർ അങ്കണവാടിയുടെ പണി പുനരാരംഭിക്കാൻ നടപടിവൈകുന്നു. കരാറുകാരൻ പണി ഉപേക്ഷിച്ചതോടെയാണ് പ്രതിസന്ധി. 2023 ഡിസംബറിലാണ് പണി തുടങ്ങിയത്. ആഴ്ചകൾക്കുള്ളിൽ മുടങ്ങി. പില്ലറുകളുടെയും ഒന്നാംനിലയുടെ കോൺക്രീറ്റിങ്ങും പൂർത്തിയാക്കിയതോടെയാണ് പണിനിലച്ചത്. നാല് വർഷത്തിന് ശേഷം കഴിഞ്ഞ ഡിസംബറിൽ രണ്ടാംഘട്ട ജോലികൾ ആരംഭിച്ചെങ്കിലും മൂന്ന് നിലകളുള്ള കെട്ടിടത്തിന്റെ ഒന്നാംനില പോലും പൂർത്തീകരിക്കാനായില്ല. പടുതോട് - എഴുമറ്റൂർ ബാസ്റ്റോ റോഡിൽ നാരകത്താനി കവലയ്ക്ക് സമീപമാണ് കെട്ടിടം നിർമ്മിക്കുന്നത്. 2017-18-ലെ ബ്ലോക്ക് പഞ്ചായത്തിന്റെ പദ്ധതിയിൽ 8 ലക്ഷം രൂപയും ഐ.സി.ഡി.എസ് ഫണ്ടിൽ നിന്ന് 7 ലക്ഷം രൂപയും ഉൾപ്പെടുത്തിയാണ് മൂന്ന് നിലയുള്ള കെട്ടിടത്തിന്റെ നിർമ്മാണം തുടങ്ങിയത്. പഞ്ചായത്ത് ഫണ്ടും നാട്ടുകാരിൽ നിന്നു സമാഹരിച്ച തുകയും ഉൾപ്പെടെ 3 ലക്ഷം രൂപ വിനിയോഗിച്ചാണ് കെട്ടിട നിർമ്മാണത്തിനുള്ള 3 സെന്റ് സ്ഥലം വാങ്ങിയത്. ഒരു സെന്റ് സൗജന്യമായി ലഭിച്ചു. നിലവിൽ വാടക കെട്ടിടത്തിൽ പ്രവർത്തിക്കുന്ന അങ്കണവാടി എത്രയും പെട്ടെന്ന് സ്വന്തം കെട്ടിടത്തിൽ ആരംഭിക്കുന്നതിന് അധികാരികൾ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

---------------

കരാറുകാരൻ പണി ഉപേക്ഷിച്ചതോടെ പ്രതിസന്ധി

പദ്ധതി ഇങ്ങനെ

3 നിലകൾ

റോഡ് നിരപ്പിന് താഴെയായി ഹാൾ

റോഡിന് അഭിമുഖമായി അങ്കണവാടി .
ഒന്നാം നിലയിൽ കുടുംബശ്രീ ഓഫീസ്, ഗ്രാമകേന്ദ്രം

-----------------

വർഷങ്ങൾക്ക് മുമ്പ് ആരംഭിച്ച അങ്കണവാടി കെട്ടിടത്തിന്റെ നിർമ്മാണം പൂർത്തിയാക്കാൻ കഴിയാത്തത് അധികൃതരുടെ നിസംഗത കൊണ്ടാണ്.

പ്രസാദ്

പ്രദേശവാസി