കൊട്ടാരക്കര: കൊട്ടാരക്കര - പുത്തൂർ റോഡിലെ സ്വകാര്യ ബസുകളുടെ മരണപ്പാച്ചിലിന് അറുതിയുണ്ടാക്കാൻ മോട്ടോർ വാഹന വകുപ്പും പൊലീസും നിരത്തിലിറങ്ങി. കഴിഞ്ഞ ദിവസം ബസുകൾ തടഞ്ഞുനിറുത്തി ആവശ്യമായ നിർദ്ദേശങ്ങൾ നൽകി. മൊബൈൽ ഫോൺ ഉപയോഗിച്ചുള്ള ഡ്രൈവിംഗ്, അമിത വേഗത, മത്സര ഓട്ടം ഇവയ്ക്ക് കടുത്ത ശിക്ഷാ നടപടികളുണ്ടാകുമെന്ന് മുന്നറിയിപ്പ് നൽകി.

പരിശോധനയും താക്കീതും

'കൊട്ടാരക്കര - പുത്തൂർ റോഡിൽ സ്വകാര്യ ബസുകളുടെ മരണപ്പാച്ചിൽ' എന്ന തലക്കെട്ടോടെ കേരള കൗമുദി കഴിഞ്ഞ ദിവസം വാർത്ത പ്രസിദ്ധീകരിച്ചിരുന്നു. വ്യാഴാഴ്ച സ്കൂട്ടർ യാത്രികനായ കടപുഴ മൂലശേരിയിൽ പി. അനിൽകുമാർ (57) ബസിടിച്ച് മരണപ്പെട്ട സംഭവത്തെത്തുടർന്ന് നാട്ടുകാരുടെ പ്രതിഷേധമടക്കം ചേർത്തായിരുന്നു വാർത്ത. ഇതേത്തുടർന്ന് കൊട്ടാരക്കര ജോ.ആർ.ടി.ഒ ദിലിപിന്റെ നിർദ്ദേശ പ്രകാരം മോട്ടോർ വാഹന വകുപ്പ് ഉദ്യോഗസ്ഥരും റൂറൽ എസ്.പി കെ.എം.സാബു മാത്യുവിന്റെ നിർദ്ദേശപ്രകാരം പൊലീസും നിരത്തിൽ പരിശോധനയും താക്കീതുമായി എത്തുകയായിരുന്നു. വരും ദിവസങ്ങളിലും പരിശോധനകളുണ്ടാകും.

• ലൈസൻസ് സസ്പെൻഡ് ചെയ്യും
• സ്കൂട്ടർ യാത്രികനായ അനിൽകുമാറിന്റെ മരണത്തിനിടയാക്കിയ ബസ് ഡ്രൈവറുടെ ലൈസൻസ് സസ്പെൻഡ് ചെയ്യാനുള്ള നടപടികൾ ആരംഭിച്ചു.
• ബസ് ഡ്രൈവറുടെ ഭാഗത്താണോ ബൈക്ക് യാത്രികന്റെ ഭാഗത്താണോ തെറ്റെന്ന കാര്യത്തിൽ ചില്ലറ ആശയക്കുഴപ്പങ്ങൾ നിലനിൽക്കുന്നുണ്ട്.
• വ്യക്തത വരുത്തിയ ശേഷം തുടർ നടപടികൾ സ്വീകരിക്കും.
• സി.സി.ടി.വി ദൃശ്യങ്ങളും ദൃക്സാക്ഷി മൊഴിയും ശേഖരിക്കുന്നുണ്ട്