കൊല്ലം: കൊല്ലം കോർപ്പറേഷൻ വളർത്തുനായ്ക്കൾക്ക് ലൈസൻസ് നൽകുന്നതിന്റെ ഭാഗമായി മൈക്രോചിപ്പ് ഘടി​പ്പി​ക്കുന്നതി​ന്റെ ഉദ്ഘാടനം 18ന് രാവി​ലെ 10ന് കോർപ്പറേഷൻ അങ്കണത്തിൽ മേയർ പ്രസന്ന ഏണസ്റ്റ് നി​ർവഹി​ക്കും.

മൃഗസംരക്ഷണ വകുപ്പിന്റെ പക്കലുള്ള വിവരങ്ങൾ പ്രകാരം കോർപ്പറേഷൻ പരിധിയിൽ 7300 വളർത്തുനായ്ക്കളുണ്ട്. കോർപ്പറേഷന്റെ ലൈസൻസ് ഒരു മാസത്തിനകം ലഭ്യമാക്കാൻ ഉടമകൾ അപേക്ഷ സമർപ്പിക്കണം. കെ-സ്മാർട്ട് ആപ്ലിക്കേഷനിൽ (https:ksmart.lsgkerala.gov.in) സിറ്റിസൺ ലോഗിൻ ചെയ്‌ത്‌ മറ്റുള്ളവ എന്ന ഓപ്ഷനിൽ ബിസിനസ് ഫെസിലിറ്റേഷൻ എന്നതിൽ നിന്ന് ഡോഗ് ലൈസൻസ് തിരഞ്ഞെടുത്ത് അപേക്ഷ സമർപ്പിക്കാം. നായ്ക്കളുടെ പേവിഷ വിവരങ്ങൾ, പ്രതിരോധ കുത്തിവയ്പ് എന്നി​വ രേഖപ്പെടുത്തിയ വാക്‌സിനേഷൻ കാർഡ്, ലൈസൻസ് പുതുക്കാൻ അപേക്ഷിക്കുന്നവർ പഴയ ലൈസൻസ് കാർഡ് കോപ്പി എന്നിവ കൂടി അപേക്ഷയിൽ ഉൾപ്പെടുത്തണം.

ബന്ധപ്പെട്ട ഉദ്യോഗസ്ഥരുടെ പരിശോധന പൂർത്തിയായ ശേഷം ഉടമസ്ഥരുടെ ഫോൺ നമ്പരിൽ ലഭിക്കുന്ന ഡിമാൻഡ് നമ്പർ ഉപയോഗിച്ച് കെ-സ്‌മാർട്ടിലെ Demand quick pay option മുഖേന ലൈസൻസ് ഫീസ് അടയ്ക്കാം. ഫീസ് അടച്ച രസീതുമായി അതത് മേഖലയിലെ മൃഗാശുപത്രിയിൽ നായയെ എത്തി​ച്ച് മൈക്രോചിപ്പ് ഘടിപ്പിക്കണം. വാക്‌സിൻ കാലാവധി കഴിഞ്ഞതാണെങ്കിൽ ബൂസ്റ്റർ ഡോസ് വാക്‌സിൻ നൽകണം. തുടർന്ന് മൈക്രോചിപ്പ് ഘടിപ്പിച്ച രേഖകൾ ലഭ്യമാകുന്ന മുറയ്ക്ക് ലൈസൻസ് കാർഡ് നൽകും.

എല്ലാ വി​വരങ്ങളും അറി​യാനാവും

മൈക്രോചിപ്പ് നമ്പർ ഡാറ്റാ ബേസിൽ ഉൾപ്പെടുത്തുന്നതി​ലൂടെ വളർത്തുനായ്ക്കളുടെ വിവരങ്ങൾ, ഉടമസ്ഥത എന്നിവ തിരിച്ചറിയാനാവും. കൂടാതെ യഥാസമയം പേവിഷ പ്രതിരോധ വാക്‌സിനേഷൻ നൽകുന്നതി​ലൂടെ പേവിഷ നിയന്ത്രണം സാദ്ധ്യമാവും. നായ ചത്താലോ മറ്റൊരു വ്യക്തിക്ക് കൈമാറ്റം ചെയ്താലോ വി​വരം കോർപ്പറേഷനിൽ അറിയിച്ച് ലൈസൻസ് റദ്ദാക്കണം. കോർപ്പറേഷന്റെ ലൈസൻസ് എടുക്കുകയോ പുതുക്കുകയോ ചെയ്തി​ല്ലെങ്കി​ൽ നിയമനടപടി ഉണ്ടാവുമെന്നും അധി​കൃതർ അറി​യി​ച്ചു.