കൊല്ലം: സംസ്ഥാന കശുഅണ്ടി വികസന കോർപ്പറേഷന് മികച്ച ഗുണനിലവാരത്തിനുള്ള ഐ.എസ്.ഒ 22000-2018 അംഗീകാരം ലഭിച്ചു. ഇന്ത്യൻ രജിസ്റ്റർ ക്വാളിറ്റി സിസ്റ്റംസ് കമ്പനിയിൽ നിന്നും പ്രതിനിധികൾ എത്തി കോർപ്പറേഷന്റെ സർട്ടിഫിക്കേഷൻ അംഗീകാരം മാനേജിംഗ് ഡയറക്‌ടർക്ക് കൈമാറി.

നിലവിൽ ഉണ്ടായിരുന്ന ഐ.എസ്.ഒ 22000-2005 സർട്ടിഫിക്കേഷനെ പുതിയ വേർഷനിൽ റീ സർട്ടിഫൈ ചെയ്‌താണ് അംഗീകാരം നൽകി​യത്. സർട്ടിഫിക്കേഷൻ ഏജൻസി കാഷ്യു കോർപ്പറേഷന്റെ യൂണിറ്റിൽ വന്ന് പരി​ശോധന നടത്തി ഉയർന്ന ക്വാളിറ്റി മാനദണ്ഡങ്ങൾ പാലിക്കുന്നു എന്നതി​ന്റെ അടിസ്ഥാനത്തിലാണ് റീ സർട്ടിഫിക്കേഷൻ ലഭിച്ചത്. എൻ.എ.ബി​.സി​.ബി​ അക്രഡിറ്റേഷനുള്ള സർട്ടിഫിക്കേഷനാണ് കോർപ്പറേഷന് ലഭിച്ചത്. ഇതിന് മൂന്ന് വർഷമാണ് കാലാവധി. ഏറ്റവും മികച്ച ഉത്പന്നം വിപണിയിൽ എത്തിക്കാനുള്ള കാഷ്യു കോർപ്പറേഷന്റെ നിരന്തരമായ ശ്രമങ്ങൾക്ക് പുതുതായി ലഭിച്ച ഐ.എസ്.ഒ അംഗീകാരം ശക്തി പകരുമെന്ന് ചെയർമാൻ എസ് ജയമോഹൻ പറഞ്ഞു.

നേട്ടത്തി​നു വേണ്ടി​ പരിശ്രമിച്ച എല്ലാ ജീവനക്കാരെയും ചെയർമാൻ എസ്. ജയമോഹനനും മാനേജിംഗ് ഡയറക്ടർ കെ. സുനിൽ ജോണും അഭിനന്ദിച്ചു.