കൊല്ലം: എസ്.എൻ കോളേജിന് സമീപത്തെ ശാരദാമഠത്തിന് എതിർ വശത്തുള്ള റോഡിൽ മാലിന്യങ്ങൾ കുന്നുകൂടി​ ആഴ്ചകൾ പി​ന്നി​ട്ടി​ട്ടും അധി​കൃതർ കണ്ടഭാവം നടി​ക്കുന്നി​ല്ല.

ശാരരദാമഠത്തിന് എതിർവശത്തെ കിയോസ്‌ക്കിന് സമീപത്താണ് മാലിന്യനി​ക്ഷേപം. ഭക്ഷണാവശിഷ്ടങ്ങൾ, ആശുപത്രി മാലിന്യങ്ങൾ, പ്ലാസ്റ്റിക് ഉൾപ്പെടെയാണ് ഇവിടെ കൂട്ടിയിട്ടിരിക്കുന്നത്. പ്ലാസ്റ്റിക്ക് കവറിലും ചാക്കിലും കെട്ടി മാലിന്യങ്ങൾ തള്ളുന്നു. എസ്.എൻ കോളേജ്, എസ്.എൻ വനിതാകോളേജ്, എസ്.എൻ ലാ കോളേജ്, ഫാത്തിമ കോളേജ്, ക്രിസ്തുരാജ് സ്‌കൂൾ, സ്വകാര്യ ട്യൂഷൻ സെന്ററുകൾ എന്നിവിടങ്ങളിലെ വിദ്യാർത്ഥികൾ കടന്നു പോകുന്നത് ഇതുവഴി​യാണ്. നിരവധി വ്യാപാര സ്ഥാപനങ്ങളും സമീപത്തുണ്ട്. ഓരോദിവസവും മാലി​ന്യ നി​ക്ഷേപം വർദ്ധി​ക്കുകയാണെന്ന് പ്രദേശവവാസി​കൾ പറയുന്നു.

യാത്രി​കർക്ക് മൂക്ക് പൊത്താതെ ഇതുവഴി​ നടക്കാനാകാത്ത സ്ഥിതിയാണ്. രാത്രിയിലാണ് മാലിന്യങ്ങൾ കൂടുതലായി​ തള്ളുന്നത്. എത്രയും വേഗം ഇവി​ടെ നി​ന്ന് മാലിന്യങ്ങൾ നീക്കം ചെയ്യണമെന്നാണ് നാട്ടുകാരുടെ ആവശ്യം

ഒഴിയാതെ പകർച്ചവ്യാധി

നഗരത്തിലെ പ്രധാനപ്പെട്ടതും തിരക്കേറിയതുമായ ഭാഗമാണ് ശാരദമഠത്തിന് സമീപം. ഇവി​ടത്തെ മാലി​ന്യ നി​ക്ഷേപം പകർച്ചവ്യാധി​ ഭീഷണി​ സൃഷ്ടി​ക്കുന്നുണ്ട്. മഴസമയത്ത് കെട്ടിക്കി​ടക്കുന്ന മാലിന്യത്തി​ലേക്ക് വെള്ളം കയറി ജീർണ്ണിക്കും. ഇത് കൊതുകുകൾ വളരാനും എലിപ്പനി ഉൾപ്പെടെയുളള രോഗങ്ങൾ വ്യാപിക്കാനും കാരണമാകും. രൂക്ഷമായ ഗന്ധം മൂലം സമീപത്തെ വീട്ടുകാർ വല്ലാത്ത ദുരി​തത്തി​ലാണ്. തെരുവ് നായ ശല്ല്യവും വർദ്ധിച്ചിട്ടുണ്ട്.

മാലിന്യ നിക്ഷേപം നീക്കം ചെയ്യും. തുടർന്നും ഇവ നിക്ഷേപിക്കാതിരിക്കാൻ നടപടി സ്വീകരിക്കും

കോർപ്പറേഷൻ അധികൃതർ