കൊട്ടാരക്കര: തുക അനുവദിച്ചിട്ടും കൊട്ടാരക്കരയിൽ സാംസ്കാരിക സമുച്ചയത്തിന്റെ നി‌ർമ്മാണം തുടങ്ങാനായില്ല. ചന്തമുക്കിൽ നിലവിൽ നഗരസഭയുടെ പാർക്കിംഗ് ഗ്രൗണ്ടിലാണ് പൊതു ഇടം നിലനിറുത്തിക്കൊണ്ടുതന്നെ സാംസ്കാരിക സമുച്ചയം നിർമ്മിക്കാൻ പദ്ധതിയിട്ടത്. കെ.എൻ.ബാലഗോപാലിന്റെ ശ്രമഫലമായി ആദ്യം 2 കോടി രൂപയാണ് ആദ്യം അനുവദിച്ചത്. അന്തിമ രൂപരേഖ പ്രകാരം 63 ലക്ഷം രൂപ കൂടി അനുവദിച്ചെങ്കിലും തുടർ പ്രവർത്തനങ്ങൾക്ക് വേഗമില്ല.

നി‌ർമ്മാണത്തിന്

2.63 കോടി

പ്രതീക്ഷകൾക്ക് മങ്ങൽ

• 250 പേർക്ക് ഇരിക്കാവുന്ന ഹാളും അനുബന്ധ സൗകര്യങ്ങളും മിനി കോൺഫറൻസ് ഹാളും ഓഫീസ് മുറികളും ലൈബ്രറിയും ടൊയ്ലറ്റുകളുമൊക്കെ അടങ്ങുന്നതാണ് വിഭാവനം ചെയ്ത സാംസ്കാരിക സമുച്ചയം.
• താഴെ വാഹന പാർക്കിംഗിന് സൗകര്യവും പൊതു പരിപാടികൾ നടത്താനാവുന്ന വിധം ഓപ്പൺ എയർ ഓഡിറ്റോറിയവും പദ്ധതിയിലുണ്ട്.
• മുൻ മന്ത്രി ആർ.ബാലകൃഷ്ണ പിള്ളയുടെ സ്മാരകമായിത്തന്നെ സാംസ്കാരിക സമുച്ചയം നിർമ്മിക്കാമെന്ന് കണക്കുകൂട്ടിയതുമാണ്. എന്നാൽ വർഷങ്ങൾ പിന്നിടുമ്പോഴും ശിലാസ്ഥാപനം പോലും നടത്താനായിട്ടില്ല.

ചെയർമാന്റെ കാലാവധി

നിലവിലുള്ള നഗരസഭ ചെയർമാന്റെ കാലാവധി രണ്ട് മാസം കൂടിയാണുള്ളത്. മുന്നണി തീരുമാനപ്രകാരം അടുത്ത ഒരു വർഷക്കാലം സി.പി.ഐയ്ക്ക് ചെയർമാൻ സ്ഥാനം ലഭിക്കും. ഇതിന് മുൻപായി നിർമ്മാണോദ്ഘാടനം നടത്താമെന്ന് കണക്കുകൂട്ടിയെങ്കിലും പുരോഗതിയുണ്ടാകുന്നില്ല. തടസങ്ങൾ ഏറെയുള്ളതിനാൽ സാംസ്കാരിക സമുച്ചയം നിർമ്മിക്കാൻ കഴിയുമോയെന്ന ആശങ്കയും നിലനിൽക്കുന്നുണ്ട്.