തൃപ്രയാർ: സംസ്ഥാനത്തെ 152 ബ്ലോക്കുകളിലും വെറ്ററിനറി ആംബുലൻസ് സംവിധാനം ഒരുക്കുമെന്ന് മൃഗസംരക്ഷണ ക്ഷീര വികസന വകുപ്പ് മന്ത്രി ജെ. ചിഞ്ചുറാണി. വലപ്പാട് പഞ്ചായത്തിൽ ആധുനിക സൗകര്യങ്ങളോടെ നിർമ്മാണം പൂർത്തിയാക്കിയ മൃഗാശുപത്രി കെട്ടിടത്തിന്റെ ഉദ്ഘാടനം നിർവഹിക്കുകയായിരുന്നു മന്ത്രി. സി.സി. മുകുന്ദൻ എം.എൽ.എ അദ്ധ്യക്ഷനായി. ജില്ലാ പഞ്ചായത്ത് പ്രസിഡന്റ് വി.എസ്. പ്രിൻസ്, തളിക്കുളം ബ്ലോക്ക് പഞ്ചായത്ത് പ്രസിഡന്റ് കെ.സി. പ്രസാദ് എന്നിവർ മുഖ്യാതിഥികളായി. ടി.ജെ. വിനോജ്, ഷിനിത ആഷിക്ക്, വി.ആർ. ജിത്ത്, ബിജോഷ് ആനന്ദൻ, മല്ലിക ദേവൻ, കെ.എ. തപതി, സുധീർ പട്ടാലി, ജ്യോതി രവീന്ദ്രൻ, സി.ആർ. ഷൈൻ, വസന്ത ദേവലാൽ, ബി.കെ. മണിലാൽ, ഡോ. ജെസി.സി. കാപ്പൻ, ഡോ. ജിതേന്ദ്രകുമാർ, സി.എൻ. ഷിനിൽ, ഡോ.ജെറി എന്നിവർ പങ്കെടുത്തു. സ്ഥലം സംഭാവന ചെയ്ത എൻ.ടി.ആർ കുടുംബശ്രീ, മികച്ച ക്ഷീര കർഷകർ, മുൻ വെറ്ററിനറി സീനിയർ സർജൻ ഡോ. സിൽവൻ എന്നിവരെ ആദരിച്ചു. വലപ്പാട് ഗവ. സ്‌കൂൾ ഗ്രൗണ്ടിന് സമീപം പഞ്ചായത്ത് 70 ലക്ഷം രൂപ ചെലവഴിച്ച് 1600 സ്‌ക്വയർ ഫീറ്റിലാണ് കെട്ടിടം നിർമ്മിച്ചിട്ടുള്ളത്. ആശുപത്രിയിലും രണ്ട് സബ് സെന്ററുകളിലും മികച്ച സേവനം ലഭ്യമാക്കുന്നതിനായി രാവിലെ 6 മുതൽ വൈകിട്ട് 6 വരെ ഒരു ഡോക്ടർ ഉണ്ടാകും.

29 ബ്ലോക്ക് പഞ്ചായത്തുകളിൽ വെറ്ററിനറി ആംബുലൻസുകൾ നൽകി. എല്ലാ വെറ്ററിനറി സെന്ററുകളിലും ആംബുലൻസുകൾ നൽകും. 1962 എന്ന നമ്പറിൽ കോൾ സെന്ററിലേക്ക് വിളിച്ചാൽ ആംബുലൻസും ഡോക്ടറും ക്ഷീരകർഷകരുടെ വീട്ടുമുറ്റത്തെത്തും. എ-ഹെൽപ്പ്, ഇ-സമൃദ്ധ പദ്ധതികൾക്കും തുടക്കമിട്ടു.
- ജെ.ചിഞ്ചുറാണി
(ക്ഷീര വികസന വകുപ്പ് മന്ത്രി)