തൃപ്രയാർ: 25ാമത് തൃപ്രയാർ നാടകവിരുന്ന് അന്തരിച്ച നടി കവിയൂർ പൊന്നമ്മയ്ക്ക് സമർപ്പിക്കും. നവംബർ 4 മുതൽ 14 വരെ തൃപ്രയാർ ടി.എസ്.ജി.എ സ്റ്റേഡിയത്തിലാണ് നാടകവിരുന്ന് സംഘടിപ്പിക്കുക. ഇതോടനുബന്ധിച്ച് പ്രസിദ്ധീകരിക്കുന്ന സോവനീർ പ്രശസ്ത നാടക പ്രവർത്തകനും നിർമ്മാതാവുമായ ആന്റണി മാത്യു, സിനിമാ സീരിയൽ നടനായ പയ്യന്നൂർ മുരളിക്ക് നൽകി പ്രകാശനം ചെയ്തു. ജനറൽ കൺവീനർ കെ.വി.രാമകൃഷ്ണൻ, കെ.ആർ.മധു, കെ.വി.സദാശിവൻ, കെ.ആർ.ബിജു, ഷെർലി ആന്റണി, ദീപ്തി സുദേവൻ എന്നിവർ പങ്കെടുത്തു. ഈ വർഷത്തെ 11 പുതിയ നാടകങ്ങളാണ് നാടകവിരുന്നിൽ അരങ്ങേറുക. ആദ്യദിനമായ നവംബർ നാലിന് തിരുവനന്തപുരം സംസ്‌കൃതിയുടെ 'നാളത്തെ കേരള', അഞ്ചിന് ചിറയിൻകീഴ് അനുഗ്രഹയുടെ 'ചിത്തിര' ആറിന് അമ്പലപ്പുഴ അക്ഷരജ്വാലയുടെ 'അനന്തരം' ഏഴിന് തിരുവനന്തപുരം നവോദയയുടെ 'കലുങ്ക് 'എട്ടിന് കൊച്ചിൻ ചന്ദ്രകാന്തയുടെ ഉത്തമന്റെ സങ്കീർത്തനം 9ന് കോഴിക്കോട് രംഗഭാഷയുടെ 'മിഠായിത്തെരുവ് 'പത്തിന് തിരുവനന്തപുരം സംഘകേളിയുടെ 'ലക്ഷ്മണരേഖ' 11ന് വള്ളുവനാട് ബ്രഹ്മയുടെ 'വാഴ്‌വേ മായം' 12ന് ആലപ്പുഴ സൂര്യകാന്തിയുടെ 'കല്യാണം' 13ന് കോഴിക്കോട് സങ്കീർത്തനയുടെ 'വെളിച്ചം' സമാപനദിനമായ നവംബർ 14ന് ചങ്ങനാശ്ശേരി അണിയറയുടെ ഡ്രാക്കുള എന്നീ നാടകങ്ങളാണ് അരങ്ങേറുക. എല്ലാ ദിവസവും വൈകിട്ട് ഏഴിനാണ് നാടകമാരംഭിക്കുക.