വലപ്പാട്: സാമൂഹിക പ്രതിബദ്ധതാ പദ്ധതികൾ സമയബന്ധിതമായി, മികച്ച രീതിയിൽ പൂർത്തീകരിച്ചതിന് ഇക്ണോമിക് ടൈംസ് ഏർപ്പെടുത്തിയ സി.എസ്.ആർ അവാർഡ് മണപ്പുറം ഫൗണ്ടേഷന്. ജില്ലയ്ക്ക് പുറമെ സംസ്ഥാനത്തുടനീളം മണപ്പുറം ഫൗണ്ടേഷൻ നടപ്പാക്കിയ സന്നദ്ധ സേവന പ്രവർത്തനങ്ങൾ വിലയിരുത്തിയാണ് അവാർഡ്. വലപ്പാട് തിരുപഴഞ്ചേരി കോളനിയുടെ സമഗ്ര വികസനം, വിധവകൾക്കും പാവപ്പെട്ടവർക്കുമായി നടപ്പിലാക്കിയ സായൂജ്യം ഭവന പദ്ധതി, മസ്‌കുലാർ ഡിസ്‌ട്രോഫി ബാധിതരും ഭിന്നശേഷിക്കാരുമായ രോഗികൾക്കുള്ള ഇലക്ട്രിക് വീൽചെയർ, മുച്ചക്ര സ്‌കൂട്ടർ വിതരണം, കൊവിഡ് മഹാമാരിമൂലം മാതാപിതാക്കളെ നഷ്ടമായ കുട്ടികളുടെ തുടർ വിദ്യാഭ്യാസ സ്‌കോളർഷിപ്പ്, നിർദ്ധന രോഗികൾക്കുള്ള ചികത്സാ സഹായം, ആരോഗ്യ വിദ്യാഭ്യാസ മേഖലയിലെ സേവന പ്രവർത്തനം, പൊലീസ് സേനയ്ക്കും സർക്കാർ ഏജൻസികൾക്കും നൽകുന്ന സഹായങ്ങൾ, കായിക മേഖലയിൽ മികവ് തെളിയിച്ച കുട്ടികൾക്കുള്ള കൈത്താങ്ങ് എന്നിങ്ങനെ സമൂഹത്തിന്റെ സമസ്ത മേഖലയിലും ഫൗണ്ടേഷന് സന്നദ്ധ സേവന പ്രവർത്തനം നടത്താൻ കഴിഞ്ഞതായി അവാർഡ് കമ്മിറ്റി വിലയിരുത്തി.
ഡൽഹിയിലെ ചടങ്ങിൽ മണപ്പുറം ഫൗണ്ടേഷൻ ചീഫ് എക്‌സിക്യുട്ടിവ് ഓഫീസർ ജോർജ് ഡി.ദാസ്, ചീഫ് പി.ആർ.ഒ സനോജ് ഹെർബർട്ട് എന്നിവർ പുരസ്‌കാരം ഏറ്റുവാങ്ങി.