കിളിമാനൂർ: വിവിധ വർണങ്ങളിൽ പുട്ടുകൾ,അലുവാ,കേക്ക്,പലതരം ഇലയടകൾ,വിവിധയിനം ലഡു,മരിച്ചീനി,ചിക്കൻ കറിയും ചപ്പാത്തിയും ചിക്കൻ മസാലയും... തുടങ്ങി വൈവിദ്ധ്യ പൂർണമായ വിഭവങ്ങളാൽ ശ്രദ്ധേയമായി കുരുന്നുകൾ ഒരുക്കിയ ഭക്ഷ്യമേള.ലോക ഭക്ഷ്യദിനാചരണത്തിന്റെ ഭാഗമായി കിളിമാനൂർ ഗവ.എൽ.പി സ്കൂളിലെ കുരുന്നുകളാണ് ഭക്ഷ്യമേള നടത്തിയത്.ഓരോ വിഭവങ്ങളുടെയും പേര് വിവരങ്ങളും വേണ്ടുന്ന പാചകം ചെയ്യേണ്ട രീതികളും കുട്ടികൾ കാണികൾക്ക് പറഞ്ഞുകൊടുത്തു.സ്കൂൾ അങ്കണത്തിൽ നടന്ന ചടങ്ങ് പ്രഥമദ്ധ്യാപിക ലേഖാകുമാരി ഉദ്ഘാടനം ചെയ്തു.ഭക്ഷ്യ ദിനാചരണത്തിന്റെ പ്രാധാന്യവും ഭക്ഷ്യദിന സന്ദേശവും പ്രഥമാദ്ധ്യാപിക കുട്ടികൾക്ക് നൽകി.പി.ടി.എ പ്രസിഡന്റ് അൻസി അദ്ധ്യക്ഷത വഹിച്ചു.എസ്.എം.സി ചെയർമാൻ രതീഷ് പോങ്ങനാട്‌,എം.പി.ടി.എ പ്രസിഡന്റ് നിഷി എന്നിവർ പങ്കെടുത്തു.