ആലപ്പുഴ : ജില്ലയിലെ സർക്കാർ സേവനം കൂടുതൽ കാര്യക്ഷമമാക്കുന്നതിനും ജനോപകാരപ്രദമാക്കുന്നതിനും വിവിധ റവന്യൂ ഓഫീസുകളിൽ ജില്ലാ കളക്ടർ അലക്‌സ് വർഗീസ് നേരിട്ട് മിന്നൽ പരിശോധന നടത്തുന്നു. കഴിഞ്ഞ ദിവസം ആര്യാട് തെക്ക് വില്ലേജ് ഓഫീസ്, ചേർത്തല താലൂക്ക് ഓഫീസ് എന്നിവിടങ്ങളിൽ മിന്നൽ പരിശോധന നടത്തി. സർക്കാർ സേവനം കൂടുതൽ ജനോപകാരപ്രദമാക്കുന്നതിനും ചുവപ്പ് നാട കുരുക്കുകൾ ഒഴിവാക്കുന്നതിനും ആവശ്യമായ നിർദേശങ്ങൾ ജില്ലാ കളക്ടർ ഉദ്യോഗസ്ഥർക്ക് നൽകി. ജനങ്ങളുമായി കൂടുതൽ ഇടപഴകുന്ന തദ്ദേശ സ്വയംഭരണം, പൊലീസ്, രജിസ്‌ട്രേഷൻ എന്നീ വകുപ്പുകളുടെ ജില്ലാതല നിയന്ത്രണ അധികാരികൾക്കും താഴെതട്ടിൽ മികച്ച സേവനം ഉറപ്പാക്കുന്നതിനുള്ള നടപടി സ്വീകരിക്കുന്നതിന് നിർദേശം നൽകി. മികച്ച സേവനം കാഴ്ചവയ്ക്കുന്ന ഉദ്യോഗസ്ഥർക്ക് സദ്‌സേവന രേഖ നൽകും .പരമാവധി സേവനങ്ങൾ ഓൺലൈനായി സമയപരിധിക്കുള്ളിൽ ലഭ്യമാക്കാനും സർക്കാർ നികുതി കുടിശ്ശികകൾ മുഴുവൻ ജനുവരി 31ന് മുമ്പായി പിരിച്ചെടുക്കാനും കളക്ടർ ഉദ്യോഗസ്ഥർക്ക് നിർദ്ദേശം നൽകി.സർക്കാർ ഭൂമി സംരക്ഷിക്കുന്നതിനായുള്ള കർമ്മ പദ്ധതി തയ്യാറാക്കി നടപടി സ്വീകരിക്കണം തുടങ്ങിയുള്ള നിർദ്ദേശങ്ങൾ ഓഫീസുകൾക്ക് നൽകി. ജില്ലയിലെ പരമാവധി ഓഫീസുകൾ നേരിട്ട് കളക്ടർ സന്ദർശിക്കും.

...........

പൊതുജനങ്ങൾക്ക് സേവനങ്ങൾ

 മുതിർന്ന പൗരൻമാർക്കും ഭിന്നശേഷിക്കാർക്കും ഓഫീസുകളിൽ പ്രത്യേക പരിഗണന നൽകണം

 ഓഫീസുകളിൽ പൊതുജനങ്ങൾക്കായി കുടിവെള്ളം ഒരുക്കണം

 ഓഫീസുകളിൽ പൊതുജനങ്ങൾക്കായി ഇരിപ്പിടങ്ങൾ ക്രമീകരിക്കണം

 റെക്കാഡുകളും രജിസ്റ്ററുകളും പരിശോധനയ്ക്ക് 15 ദിവസത്തിനകം സജ്ജമാക്കണം
 പട്ടയ അപേക്ഷകളിന്മേലും ഉടൻ നടപടികൾ പൂർത്തീകരിക്കണം

........

''സംസ്ഥാനത്തെ ഏറ്റവും മികച്ച പൊതു സേവനം ലഭ്യമാകുന്ന ജില്ലയായി ആലപ്പുഴയെ മാറ്റുക എന്നതാണ് തന്റെ പ്രഥമ ലക്ഷ്യം. വേമ്പനാട് കായൽ അടക്കമുള്ള പ്രകൃതി സംരക്ഷണത്തിനും കനാൽ നവീകരിണത്തിനും പ്രത്യേക പരിഗണന നൽകി നടപടികൾ ആരംഭിച്ചു കഴിഞ്ഞു.

- അലക്‌സ് വർഗീസ് ,ജില്ലാ കളക്ടർ