ആലപ്പുഴ: ജില്ലാ ശിശുക്ഷേമ സമിതിയുടെ ആഭിമുഖ്യത്തിൽ നഗരത്തിൽ കുട്ടികളുടെ വർണ്ണാഭമായ ശിശുദിന റാലി സംഘടിപ്പിച്ചു. ജില്ലാ പൊലീസ് മേധാവി എം.പി.മോഹനചന്ദ്രൻ സല്യൂട്ട് സ്വീകരിച്ചു. അഡീഷണൽ ജില്ലാ മജിസ്‌ട്രേട്ട് ആശ സി.എബ്രഹാം റാലി ഫ്ലാഗ് ഓഫ് ചെയ്തു. തുടർന്ന് തുറന്ന ജീപ്പിൽ കുട്ടികളുടെ പ്രധാനമന്ത്രി നിവേദ്യ ലാൽ, പ്രസിഡന്റ് ആരോൺ.എസ്.ജോൺ, എസ്.ചാരുലത, ഫൈഫാ റാഷിദ് എന്നിവർ അഭിവാദ്യം സ്വീകരിച്ച് റാലി ജവഹർ ബാലഭവനിൽ സമാപിച്ചു. തുടർന്ന് നടന്ന സമ്മേളനം കുട്ടികളുടെ പ്രധാനമന്ത്രി നിവേദ്യ ലാൽ ഉദ്ഘാടനം ചെയ്തു. പ്രസിഡന്റ് ആരോൺ.എം.ജോൺ അദ്ധ്യക്ഷത വഹിച്ചു. എസ്.ചാരുലത, ഫൈഫ റാഷിദ്, രാമൻ ആർ.നായർ എന്നിവർ പ്രസംഗിച്ചു. എച്ച്.സലാം എം.എൽ.എ ശിശുദിന സന്ദേശം നൽകി.വിവിധ മേഖലയിൽ പ്രാഗത്ഭ്യം തെളിയിച്ച ശ്രേയ, ആൻമരിയ, അഭിനവ് ശ്രീറാം എന്നിവരെ ബാലാവകാശ കമ്മീഷൻ അംഗം അഡ്വ. ജലജ ചന്ദ്രൻ ആദരിച്ചു. സമ്മാനദാനം ജില്ലാ ശിശു സംരക്ഷണ ഓഫീസർ ടി.വി.മിനിമോൾ നിർവ്വഹിച്ചു. റാലിക്ക് ശിശുക്ഷേമസമിതി ഭാരവാഹികളായ കെ.ഡി.ഉദയപ്പൻ, കെ.പി.പ്രതാപൻ, കെ.നാസർ, സി.ശ്രീലേഖ, നസീർ പുന്നയ്ക്കൽ ,ടി.എ.നവാസ്, ആർ.ഭാസ്‌ക്കരൻ എന്നിവർ നേതൃത്വം നൽകി.