മാവേലിക്കര : പ്രശസ്ത ഗാനരചയിതാവ് എ.വി.വാസുദേവൻ പോറ്റി (73) നിര്യാതനായി. 1951 ഒക്ടോബർ 25ന് മാവേലിക്കര അത്തിമൺ ഇല്ലത്ത് എൻ.വാസുദേവൻ പോറ്റിയുടെയും മണ്ണാറശ്ശാല ഇല്ലത്ത് ദേവകി അന്തർജനത്തിന്റെയും മകനായി ജനിച്ചു. 19ാം വയസ്സു മുതൽ ആനുകാലികങ്ങളിൽ കവിതകൾ എഴുതി തുടങ്ങി. 89ൽ പുറത്തിറങ്ങിയ മണ്ണാറശ്ശാല നാഗസ്തുതികൾ ആണ് ആദ്യ ആൽബം. പിന്നീട് തത്ത്വമസി എന്ന അയ്യപ്പഭക്തി ഗാനങ്ങളുടെ ആൽബം പുറത്തിറക്കി. ദേവിഗീതം എന്ന ആൽബത്തിലെ പാട്ടുകൾ വാസുദേവൻ പോറ്റിയെ പ്രശസ്തനാക്കി.

1995ൽ കാക്കയ്ക്കും പൂച്ചയ്ക്കും കല്യാണം എന്ന ചിത്രത്തിൽ രവീന്ദ്രന്റെ സംഗീതത്തിൽ 'എൻ ജീവനെ' എന്ന ഗാനം എഴുതി സിനിമയിൽ തുടക്കം കുറിച്ചു. റെയിൽവേയിൽ ചീഫ് ടിക്കറ്റ് എക്സാമിനറായി വിരമിച്ച വാസുദേവൻ പോറ്റി പാലക്കാടായിരുന്നു താമസം. സംസ്കാരം ഇന്ന് ഉച്ചക്ക് 2ന് മാവേലിക്കര അത്തിമൺ ഇല്ലത്ത്. ഭാര്യ :നിർമ്മലാദേവി. മക്കൾ : സുനിൽ, സുചിത്.