മാന്നാർ: സി.പി.എം മാന്നാർ ഏരിയാ സമ്മേളനത്തിന് പുലിയൂരിൽ തുടക്കമായി. കൊടിയേരി ബാലകൃഷ്ണൻ നഗറിൽ (കുളിയ്ക്കാംപാലം പുലിയൂർ മാർത്തോമാ കമ്യൂണിറ്റി ഹാൾ) പ്രതിനിധി സമ്മേളനം ജില്ലാ സെക്രട്ടറി ആർ.നാസർ ഉദ്ഘാടനം ചെയ്തു. കുളിയ്ക്കാം പാലത്തിൽ നിന്നും പ്രകടനമായി എത്തിയ പ്രതിനിധികൾ സമ്മേളന നഗറിൽ തയ്യാറാക്കിയ രക്തസാക്ഷി മണ്ഡപത്തിൽ പുഷ്പാർച്ചന നടത്തി. മുതിർന്ന അംഗവും ഏരിയാ സെക്രട്ടറിയുമായ പ്രൊഫ.പി.ഡി ശശിധരൻ പതാക ഉയർത്തി. രക്തസാക്ഷി പ്രമേയം പി.ഡി സന്തോഷ് കുമാറും അനുശോചന പ്രമേയം കെ.പ്രശാന്ത് കുമാറും അവതരിപ്പിച്ചു. കെ.നാരാണപിള്ള (കൺവീനർ), കെ.എം അശോകൻ, സുരേഷ് മത്തായി, ബി.കെ പ്രസാദ്, ശോഭാ മഹേശൻ എന്നിവരാണ് പ്രിസീഡിയം. വിവിധ സബ് കമ്മിറ്റികളെയും തിരഞ്ഞെടുത്തു. സ്വാഗത സംഘം കൺവീനർ കെ.പി പ്രദീപ് സ്വാഗതം പറഞ്ഞു. ഏരിയാ ആക്ടിംഗ് സെക്രട്ടറി പുഷ്പലത മധു പ്രവർത്തന റിപ്പോർട്ട് അവതരിപ്പിച്ചു. സംസ്ഥാന സെക്രട്ടേറിയറ്റംഗം സജി ചെറിയാൻ, ജില്ലാ സെക്രട്ടേറിയറ്റംഗങ്ങളായ എ.മഹേന്ദ്രൻ, കെ.രാഘവൻ, ജി.രാജമ്മ, എം.സത്യപാലൻ, ജില്ലാ കമ്മിറ്റിയംഗം ആർ.രാജേഷ്, ഏരിയ സെക്രട്ടറി പ്രൊഫ.പി.ഡി ശശിധരൻ എന്നിവർ പങ്കെടുത്തു. സമ്മേളനം ഇന്നും തുടരും. ചർച്ചയ്ക്കും മറുപടിക്കു ശേഷം പുതിയ ഏരിയ കമ്മിറ്റിയെയും സെക്രട്ടറിയെയും ജില്ലാ സമ്മേളന പ്രതിനിധികളെയും തിരഞ്ഞെടുക്കും. വൈകിട്ട് നാലിന് പ്രകടനവും കുളിക്കാം പാലത്തിൽ നിന്നും ചുവപ്പുസേന പരേഡും പൊതു സമ്മേളനവും നടക്കും. സീതാറാം യെച്ചൂരി നഗറിൽ (പുലിയൂർ പഞ്ചായത്ത് സ്റ്റേഡിയം) ചേരുന്ന പൊതുസമ്മേളനം സജി ചെറിയാൻ ഉദ്ഘാടനംചെയ്യും.